Shillong, Jylliew 27: Ki San tylli ki Sengbhalang ba pawkhmat ka jylla, KSU, FKJGP, HNYF, RBYF bad JSU, ki la rai ba kin biang shakhmat ban pynkhih ïa ka jingdawa pyntreimam ïa ka ILP, ban pynbeit ïa u pud u sam bad kiwei kiwei.
Ha ka kyrwoh ba la phah da u Bah Bah Dundee Cliff Khongsit, Working President ka FKJGP Sengkmie, la ong ba kine ki san Seng, ki la pynlong ïa ka jingialang kaba kyrkieh ha ophis KSU, ha kaba la wan ban ïa shim bynta da ki Nongialam ba hakhlieh duh jong kine ki Seng.
U Bah Dundee, u la ïathuh ba ha kane ka jingïalang, la ïoh ban ïatai sani ïa kiba bun ki mat kiba ktah ïa ka ïap ka im jong ka jaitbynriew hi baroh kawei. Ha katei ka jingïalang kaba la neh bun kynta na ka liang jong ki Nongialam na ki seng bhalang bapher bapher kila pynpaw ka jingsngew bynñiaw kaba khraw halor ki jingsah teng jong kiba bun ki mat bapher bapher ïa kaba kum ki kynhun seng bhalang kila ju dawa bad ïakren bad ka sorkar na ka por sha ka por hynrei ym pat shym la lah ban pynurlong wat haduh kane ka khyllipmat kaba mynta.
Kumta katei ka jingialang kaba kyrpang da kawei ka sur ka la shim iaka rai ba shen kin sa sdang biang ban pynsawa jam ïa ka sur ban ïai bteng ïa ki jingdawa ba dang sahteng kiba kynthup ia ka ILP, kam khappud bad kiwei kiwei de ki mat kiba kham hakhmat kiba kum ka jaitbynriew kala donkam kyrkieh.
U nongïalam ka FKJGP, u la ong ruh ba bad kane ka kynhun kan sa shim da ki sienjam ban bishar sani ïa ki prokram jingïakhih nangne sha khmat ban pynkyndit bynriew ïa ka Sorkar Jylla bad Sorkar pdeng ruh kumjuh bad kin sa shong biang ïaka jingialang ha ki khyndiat taiew ki ban sa wan ha ryngkat bad ki kynhun seng bhalang kiba na na Ri Lum Garo kiba la ju ïatreilang na ka por sha ka por khnang ba ki jingiakhih kin long salonsar ha baroh kawei ka jylla.
