Nongstoiñ, Nailar 4: Watla kiba bun ki paitbah ka jylla ki ju kynthoh na ka por sha ka por ba ka Bharatya Janata party (BJP), ka dei ka party kaba ki paitbah nongshong shnong baroh kim kwah ba kan don ha ka jylla. Hynrei kumba ka long hi kiba bun ki riew rangbah na West Khasi Hills, ki la sdang ban phai khmat sha ka BJP namar ba ka dei ruh ka party kaba bat ïa ka bor synshar hapoh ka ri.
Haba phai ha ka election ka ban sa long ha u snem u ban wan kata ha u 2023 ha West Khasi Hills District, katei ka party ka la don lypa ar ngut ki rangbah kiba la biang ha ka kyrdan pule bad ka karta kiba don ka jingthmu ba kin mih madan ha ka election ban wan. Kitei ki arngut ki rangbah ki dei u bah Herbert Kharbani u ba la pynkhreh mynta ban ïakhun na ka Nongstoiñ Constiuency bad u bah Spastarlin Nongrem u ba la pynkhreh ban ïakhun na ka Rambrai Jyrngam Constituency.
Kitei ki ar ngut ki rangbah, u bah Herbert Kharbani u dei u ba la paw bha ha poh ka jylla bad uba la ïoh ruh ïa ka kyrdan Doctor, ha ka jingshna bad sumar ïa kiba pang ba shitom da ki dawai kynbat bad na ka liang ka sorkar ruh, ka la ithuh bha ïa u bad u la don ruh ïa ki syrnod kum u Doktor dawai kynbat na ki jaka pule bapher bapher kiba don hapoh ka ri. Katba u bah Spastarlin Nongrem pat, u la dei uwei na ki nonghikai skul u ba la paw bha bad u dei ruh ha kajuh ka por kum u nongai buit jong ka Synjuk Nongai Dawai Khasi Nylla jong ka West Khasi Hills.
Ha kaba ïadei bad ka jingthmu jong kitei ki ar ngut ki rangbah ban ïakhun ïa ka election ha u snem ban wan, la ïoh ban ïakren bad kitei ki rangbah kiba la ong ba mynta ki dang ap ïa ka jingmynjur na ka BJP Meghalaya State Unit, la ka mynjur ne em ïa ki kum ki kyrtong ki ban ïakhun na kitei ki Constituency kumba ki la angnud.
Ki la ong ruh ba wat la ka State Unit jong ka party kam pat shong ïa ka Komiti na ka bynta ban jied ïa ki kyrtong ruh, hynrei namar ba ki la thmu ban ïaleh elekshon kumta ki la nang pynkhreh shait shait ïa ki jingdonkam na ka bynta ban pynbit pynbiang katkum ki jingdonkam.
Na ka liang u bah Nongrem u la ong ba lada phai ha ka jinglong jingman jong ka ri India ha kine ki snem, ha kaba ka Bharatya Janata Party ka la ïoh ban synshar bad u Narendra Modi u long u Myntrei Rangbah duh ka ri, ka la don ka jingkylla nadong shadong la ka long ha ka roi ka par, ha ka ïoh ka kot bad ha kiba bun ki liang. U la ong ruh ba ka jingkiew sted jong ka ri ha ki bun ki liang, ka pyni ba ka BJP ka dei ka party kaba don ïa ka jingkitkhlieh na ka bynta ki paitbah jong ka ri baroh kawei.
U bah Nongrem u la ong ruh ba ka jingthmu jong u ban ïaleh election, kam mut ba un ïaleh da ka pisa namar u dei ruh u briew u bym don ei ei. Hynrei ka thong ka jong u ka long ban ïaleh election da ki ishu bad ka thong kaba ha khmat eh, ka long ban kyntiew shuh shuh ïa ka ïoh ka kot, ka jingnang jingstad ka roi ka par bad ban pynkhlaiñ ïa ka rep ka riang, da kaba wanrah ïa ki lad jingïarap kiba la mang kyrpang da ka sorkar pdeng.
Nalor kata u la ong ruh ba ha kine ki sngi, u la sdang ban rung ha ki shnong ki thaw ban pynsngew thuh ïa ki paitbah halor ki mat treikam jong ka party bad ka shong ha ki paitbah la kin pdiang ne kim pdiang bad u ong ruh ba u ieh ha ka jingstad jong ki paidbah ba kin pynshong nongrim katkum ka bor sngewthuh ka jong ki khnang ba kin dup iohi ia ki jingkylla hi snem ki ban sa wan.
