Shillong, Ïaiong 08:Ka Tnad Meghalaya Police kala pynkhlaiñ mynta ïa ka jingpahara ha baroh ki jaka pule ka Nong bah Shillong hadien ka jingmih ka jingbyrngem pynbthei bomb da ka kynhun ba tip kum ka Lawei ba Phyrnai lyngba ka email.
Ka Special Director General of Police Kong Idashisha Nongrang hynne ka sngi thohdieng kala pyntip ba ka jing tohkit kala ïaid shakhmat ban ïohkem ïa ki briew kiba donkti ban phah ïa ka email.
Ha ka shithi bala phah lyngba ka email sha u Myntri Rangbah ka Jylla Conrad Kongkal Sangma dang shen, ka “Lawei ba Phyrnai”, kaba kam ïalade kum ka kynhun kiengatiar, bala seng da ki 37 ngut ki briew bala nang la stad ba ba khlem kam, kala byrngem ba ka jingpynbthei bomb kan jia manla ka taiew naduh ka 1 tarik Jymmang 2022.
Ha kajuh ka por, u Deputy Inspector General of Police (Eastern Range) Davis R Marak ula pyntip ba ka Tnad Pulit kala register ïa kane ka case hapoh ka Cyber Wing bad Crime Branch Police Station, kiba la pynlong ïa ka jing tohkit mynta.
“Ngi ju shimkhia beit haba don ki jingbyrngem bad ngi ju shimkhia ban tohkit bniah ïa kine ki kam” ong u Marak.
Haba kylli la kane ka kyndon ka iadon bynta bad ka HNLC, u DIG ula ong “Ngam lah ban ong bad shu antad ïa mynta. Ngin sa lah ban pyntip mano ba donkti ha kane ka kam hadien ba ngi la tohkit”.
Halor ka jingpahara ïa ki jaka pule, u Marak ula ong ba ki jingbthah kila leit sha ki Superintendent of Police ba kin shim ïa ki sienjam ba lah ban tehlakam bad ban iada.
Kine ki Heh Pulit kila kyntait pat ban ai jingtip shuh shuh da kaba ong “Ngam lah ban batai ïa phi ïa kaei kaba ngi tohkit bad kumno ngi pynïaid ïa ka jingtohkit hynrei nga shu ïathuh ba ngi la tohkit ïa kane ka kam”.
Kat kum kane ka email, ka Lawei ba Phyrnai kala byrngem ban pynbthei bomb nyngkong eh ha ka MBoSE Building, bud sa ka St.Anthony’s School bad College bad ka North Eastern Hill University (NEHU).
“Ngin ïai bteng ban buh bomb tad haduh ba ka Sorkar ka thaw ïa ki lad ki lynti ban aikam ïa man ki nong Meghalaya” ong ka email.
