Shillong, Jylliew 27: U Deputy Inspector General of Police (Eastern Range) u Davis NR Marak ha ka sngi Palei u la ong ba ki pulit ka jylla ki la shim ïa ki sienjam kiba khlaiï ban pynbiang bad ban ai ki lad jingïada ïa ka Meghalaya High Court bad kiwei pat ki jaka treikam jong ka sorkar kiba don ha ka jylla.
Kane ka jingong jong u ka la wan hadien ba ka la don ka jingshah byrngem pynbthei bom ka Meghalaya High Court kaba la wan lyngba ka Email bad la ong ba ka jingmaham ka la jia ruh ha ka 6 tarik u Kyllalyngkot mynta u snem.
“Ngi la phah ïa ki bomb squad ban pynshisha halor kane ka jingshah byrngem. Hynrei ngi la lap pat ba kane ka jingpyntieng ban pynbthei bom kadei kaba thok. Kumta kam shym la don kano kano ka jingujor FIR halor kane ka kam,” ong u Marak.
“Na ka liang ki pulit ki la shim khia bha ha kaba ïadei ki lad ai jingïada ïa ka High Court bad kiwei pat ki jaka treikam jong ka sorkar,” u la ong.
U la ïathuh ruh ba ka kam ha kaba ïadei bad ki lad ai jingïada kan long kawei na ki kam ban ïakren hapoh ka SsP-Cos Conference, ka ban sdang ha ka sngi Thohdieng ha police headquarters.
“Ngi la dep ruh ban ïasyllok halor ka roadmap ban pynbha ïa ki lad jingïada jong ka High Court khnang ban lah ban ïakren ha ka jingïalang ha ka sngi Thohdieng,” ong u Marak.
