Shillong, Nailar 13 : Ka Sorkar Jylla kala pynkhlaiñ bha ïa ki kam pahara ha kylleng ki jaka ka Jylla ban pynthikna ba ka jingrakhe Independence Day (I-Day) kan long kaba suk ba saiñ bad ba ïaid beit ïaid ryntih la 15 tarik Nailar.
U Symbud Myntri Rangbah ki kam Pohïing (Police) Bah Prestone Tynsong ha ka sngi Balang, ula lum ïa ka jingïalang bad ki khlieh jong ki District ban shongbishar ïa ki jinglong jingman ka suk ka saiñ bad ka jingkhmih bniah ïa ki lad pahara.
“Nga la shong bishar kam halor ka kam pahara na ka bynta ka jingrakhe I-Day ban wan bad baroh ki Deputy Commissoner (DC) bad ki Superintendent of Police (SP) ki kular ïa ngi ba ka jingrakhe kan long kaba suk basaiñ bad ka ba lait na kino kino ki jingjia” ong u bah Prestone haba ïakren bad ki nongthoh khubor.
Watla ka don ka jingkam ïa ka jingduna ki nongwan ïashimbynta ha ki snem bala leit noh, u Bah Prestone ula aidaw ïa ka jingduna namar ka jingther u slap bad ong ruh ba ka jingwan poi ki briew ka long kaba ihun ha ki snem bala leit.
“Ka long kaba bakla lada phi ong ba ha kine ki arsnem, ki briew kim shym la mih ban ïashimbynta ha ka jingrakhe. Lait noh haba jur slap, ka dei da kawei pat ka daw” ula ong haba pynpaw ïa ka jingsngewskhem ba ki paidbah kin mih bun bha sha ka jingrakhe I-Day mynta u snem ruh kumjuh.
