Pynkhlaiñ ka seng ïa ka jingshakri da kaba dang pynskhem ïa ki nongïalam ka HANM Bhoirymbong

Nongpoh, Risaw 26 : Ban dang pynkhlaiñ ïa ka jingshakri sha ki paidbah lyngba ki shnat treikam bapher bapher jong ka seng ha ka jylla, u Presdient ba rangbah ka HANM Sengkmie ha ka sngi Saitjaiñ u la leit ban hiar sha ka Shnong Bhoirymbong ha Ri Bhoi District na ka bynta ban pynskhem ïa ki nongïalam ba pura ka HANm Bhoirymbong Circle.
Ïa kane ka jingïalang pynskhem ïa ki nongïalam ka HANM Bhoirymbong Circle la pynlong ha Bhoirymbong da ka jingdon lang u Bah Lamphrang Kharbani kum u President ba rangbah bad ha ryngkat ka jingdon lang ki nongkitkam ka HANM bad kitei ki samla ba la wan ban pynïasoh ne long dkhot ha ka shatri jong ka seng HANM.
Kine ki nongïalam ka HANM Bhoirymbong Circle ba la pynskhem ha kane ka sngi, ki kynthup ïa u Bah Rodrik Rocky Syiemiong, kum u President, u Bah Raplang Sumer kum General Secretary, u Bah Klesing Lyngdoh lem bad kiwei ki nongïalam bad ki dkhot kane Circle.
Kum u President ba rangbah ka seng, haba kren ha kane ka sngi u Bah Lamphrang Kharbani, u la shim ïa ka lad ban ai khublei kyrpang ïa kine ki samla kiba la wan ban pynïasoh sha ka seng bad u kyrmen skhem lyngba ka shatri jong ka seng HANM kine ki samla kin ai ka jingshakri kaba bha tam ïa ki paradoh ki parasnam.
Ha kawei ka bynta, u la kyntu ruh ïa kine ki nongïalam ba kin ai kataka jingïatrei lang bad ki bor shnong, ki bor raid bad bor hima bad khamtam kum ki samla ki dei ban don ka jingkitkhlieh ban ïada ïa ka khyndew ka shyiap bad ban ïakhun na ka bynta ka hok jong ka jaid bynriew.
Shuh shuh, u la ai mynsiem ruh ïa kine ki nongïalam ba kin don ïa kata ka mynsiem ieit jaid bynriew ban pynkhlain lyngba ki kam shakri bad kim dei ban shim kabu ha ka kyrteng ka seng da kaba wan rung ne pynïasoh tang ban myntoi shimet bad ka jingdon hapoh ka seng ka long ban shakri na ka bynta ka eh ka shon jong ka jaid bynriew, u la bynrap.