Kochi, Lber 31 : U khlur ïalehkai phutbol ba kha ha Australia hynrei uba la jied pat ban mih madan ïa ka India, u Ryan Williams u la ïoh ban thep ïa ka kol kaba nyngkong jong u tang ha ka minit kaba saw jong ka kylla step, kata ruh ha ka sien mih madan kaba nyngkong jong u ïa ka Ri ha ka lympung ïakhun ba khatduh ban knieh rung sha ka Asian Cup ha kane ka sngi Ba-ar.
Ha kane ka jingïakhun kaba itynnad bha kaba long ha Jawaharlal Nehru Stadium in Kochi, ka India lyngba ki kol na u Ryan Williams bad Akash Mishra ka la jop da 2-1 kol ïa ka Hongkong. Ïa ka shi kol jong ka Hongkong ha kane ka sngi la ïoh ban thep da u Everton ha ka minit kaba 65 jong ka kylla miet.
Haba phai sha ka jingïakhun, kine baroh ar tylli ki kynhun watla ki la ïakhun tyngeh ban ïoh ïa ka jingjop hynrei ha kaba khatduh ka India ka la ïoh ban khur ïa ka jingjop kaba nyngkong. Tangba kine baroh ar kynhun ki la shah weng noh na ka lympung shwa jong kane ka jingïakhun.
Na bynta ka India watla ka la shah weng noh na ka lympung hynrei ka la ïoh pat ban khur san point, kata kawei ka jingjop bad ar tylli ki jingïakhaid hynrei ka dang hap pat ban don sha trai duh jong ka miej kheiñ point ha ka Group C.
Shwa kane, dei ka Hongkong kaba la lah ban pynliem ïa ka India da 1-0 kol ha ka jingïakhun kaba long ha ka 10tarik Jylliew, 2025.
Ha kane ka sngi, ka kol kaba ar jong ka India ka la wan tang hadien khyndiat minit mar ïa sdang jong ka kylla miet hadien ba u Mishra khlem bakla u la ïoh ban pyndei suk ïa ka bol ba kan rung sha ka jar jong ka Hongkong ha ka minit kaba 50.
Na ka liang ka Singapore pat kaba la pynliem ïa ka Bangladesh da 1-0 kol ha la iing ha kane ka sngi, ka la ïoh ban rung sha ka 2027 Asian Cup kumba ka lahduh ha ka Group C da ki 14 point na ki hynriew tylli ki jingïakhun.
