Pynkhih biang ka NESO ïa ka jingdawa ILP bad dawa pyndam noh ïa ka CAA

Shillong, Naiwieng 26 : Ka kynhun ki samla pule ka thain shatei lam mihngi jong ka Ri hapoh ka lama jong ka
North East Students’ Organisation (NESO) ka la rai ban wad ki lad ki lynti ban ïa khun pyrshah ïa ka jingrung beaiñ ki mynder sha kane ka thain shatei lam mihngi jong ka ri.
Katei ka rai ba ka NESO ka shim kadei hadien ka jingïalang ba lai sngi kaba long ha ka Headquarter jong ka Khumulwng Tripura Tribal Areas Autonomous District Council (TTAADC) kaba long naduh ka 24 haduh ka 26tarik mynta u bnai ïa kaba la pynlong da ka Tripura Students’ Union (TSF).
Haba kren bad ki lad pathai kihubor hadien ka jingïalang, u Chairman ka NESO Bah Samuel B Jyrwa u la ong ba katei ka conference ka la shim ruh da kawei ka rai ba ka ishu rung kyrthlep ki mynder ka la don bad ka dang ïai dei hi ka jingma kaba khraw tam ïa ka tynrai bad ka jinglong kyrpang jong ki trai shnong trai muluk jong ka thaiñ shatei lam-mihngi ka Ri.
“Naba ka NESO bad ki kynhun ba donlang ki la shimkhia ïa kane ka bynta, kumta ngi la rai ba donkam kham bun ki sienjam ban shim kyrpang da ka NESO bad ruh da ki kynhun ba donlang ha ka. Ngi la rai ruh ban wad ki lad ki lynti ban ïakhun ïa kane ka jingma bad ngin ïai bteng ruh ban shim ïa kane ka mat bad ki sorkar jylla bapher bapher lane wat bad ka sorkar pdeng ban ïakhun katkum ka jinglong jingman jong kato ka jylla,” u la ong.
Utei u nongïalam ka kynhun u la ong ruh ba ka pule puthi mynta ha ka thaiñ shatei lam-mihngi jong ka Ri kadei beit tang ka pule puthi kaba long salonsar.
“Watla kum ka iing ka pdiang ïa ka jingdonkam jong ka pule puthi kaba long salonsar, hynrei ngi la rai pat ba kane ka rukom pule puthi donkam ruh ban pynrung noh da ki jait jingpule kiba lah ban kham suk ka ïohkam ïohjam da kaba wanrah ïa ki jaka pule ba ai jinghikai ban treikam (vocational institute). Donkam ruh ba ka pule puthi kadei ban long katkum ka jaka ne ka jinglong tynrai la ka long ha ka kolshor, ka khana pateng, ka jaka bad kiwei kiwei,” u la ong.
Ka NESO ka dawa ruh ban buh khambun ki jaka pule kiba kham biang ha baroh ki jylla kiba don ha ka thaiñ shatei lam-mihngi jong ka ri lane kita ki Technical bad Professtional Institute.
Haba ïadei pat bad ka jingïada ba kyrpang na kabynta ka Tripura, u Chairman ka NESO u la ong ruh ba kum ka kynhun da kawei ka sur ki la shim ruh ïa ka rai ban dawa ïa ka jingïada kaba kyrpang da ka Riti Synshar jong ka Ri hi na bynta ka Tripura.
“Ka NESO bad ki paidbah ka thaiñ shatei lam-mihngi jong ka Ri ki dei ban kyrshan lang ïa ki paidbah ka thaiñ shatei lam-mihngi jong ka Tripura ban ïada bad kyntiew ïa ka jinglong tynrai, ka kolshor bad ka hok jong ki haba ïadei bad ka jingdon ka spah mariang,” u la bynrap shuh shuh.
Nalor kitei ki mat jingdawa ba kongsan, ka NESO ka la dawa ruh ban pyntreikam noh ïa ka Inner Line Permit ha baroh ki jylla kiba dang sah jong ka thaiñ shatei lam-mihngi jong ka Ri, nangta ban pynlong ïa ka NRC ha baroh ki jylla ba dang sah ka thain da kaba shim pat ïa u snem mait kyrteng katkum ka jinglong kyrpang jong kato ka jylla.
Ki la dawa ruh ba dei ban pyndam noh wat ïa ka ain ïakjakor ba la tip kum ka AFSPA.
“Ka jingpyrshah bad ka jingdawa ban pyndam noh ïa ka Citizenship Amendment Act (CAA) 2019, ka jingïada ba kyrpang bad ka jinglong hok ïa ki jaka ba don ka spah mariang, ban pynbna ïa ka jingshlei um bad twa khyndew ha ka thain shatei lam mihngi ha ka ri kum kawei na ki jingeh ha ka ri, ban pyndep noh ïa ka jingpynbeit pud hapdeng ki jylla bad ruh ka jingai jingithuh noh ïa ka Ktien Kok Borok, Ktien Khasi bad Ktien Garo ha ka Khyrnit kaba Phra jong ka Riti Synshar jong ka Ri,” la bynrap shuh shuh u Bah Samuel Jyrwa.