Pynkhie im biang ki samla pule ka SSSM ïa ki jingïalehkai tynrai ba la jan duhjait
Ka ‘la-Bam-Blang, ka Tied-di-Bit, ka Dieng-Dang.
Mawkyrwat, Risaw 20: Ka Sngap Syiem College, Mawkyrwat ka dei kawei na ki kolej ba don hapoh jong ka South West Khasi Hills District da ka jingsngewkhia na ka bynta ki jait jingïalehkai kiba la sdang ban duh jait ha kaba ki khynnah ne ki samla ka juk mynta kim tip shuh ban ïalehkai, kumta ha ka jingïalehkai jong ka College Week 2025 ki la ïoh ka lad ban ïalehkai bad pynkhie im biang ïa ki jingïalehkai tynrai kiba long-shwa man-shwa ki ju ïalehkai ban pynbyrngia.
Lah ban kdew ba ki jait jingïalehkai ba ki long-shwa man-shwa ki ju ïalehkai ki khot kum ka ‘la-Bam-Blang, ka Tied-di-Bit, ka Dieng-Dang ba ïa mareh thong da ki dieng ne ki siej ba don tang uwei u tnad bad ka Mawpoiñ ha kane ki jingïalehkai tynrai ba la jan duhjait na ka liang ki samla pule jong ka Sngap Syiem College Mawkyrwat ki la wanrah biang ban pyni paidbah hapoh kolej.
U Dr. S. Ramsiej uba dei u Chairman jong ka Sports Committee jong ka Sngap Syiem College, Mawkyrwat bad u samla Machester Jyrwa uba dei u samla pule haba kren ha ki lad pathai khubor ki la ïathuh ba ka jingthmu ban pynlong kum ïa kine ki jait jinghikai tynrai ka long khnang ban pynkhie im biang ïa ki jingïalehkai tynrai u khasi kiba la sdang ban duh jait ha kane ka juk ba mynta ba ki pateng ban wan kin dup kynmaw bad kin dup tip ïa kaei ba u long-shwa man-shwa ju pynbyrngia ha kum kine ki jait jingïalehkai.
Namarkata, ha kitei ki jait jingïalehkai ba ki samla kiba pule hapoh jong ka Sngap Syiem College, Mawkyrwat ki la dep ban pyni da kaba ki la pynlong ruh ki jingïakop ha kaba ki samla ki la ïoh ban ïashimbynta shitrhem bha bad ki don ruh ki nongjop.
Kata, ki nongjop ha ka jingïalehkai Dieng-Dang jong ki shynrang ki long u Wankyrshanbor Marngar, u Luckyson Kharlyngdoh bad u Wonderful Paliar bad jong ki kynthei pat la rah da ka Pynsngewbha Thongni bad ka Bakordor Kharlyngdoh. Nangta, ha kane ka jingïalehkai ’la-Bam-Blang ki nongjop ki long u Wonderful Paliar, u Wankyrshanbor Marngar bad u Alandonald Jyrwa.
Ki nongjop ha ka jingïalehkai Tied-Di-Bit: ki long u Banteiborlang Marngar, ka Mebalarihun lyngkhoi bad ka Fifamerry Mawlong.