Jowai, Risaw 13: Ka West Jaiñtia Hills Karate Do Association kala pynkhe im biang ïa ka jingïalehkai (Karate) hapoh ka District da kaba pynlong ïa ka jingai jinghikai (Special Training Camp) naduh ka 7 tarik haduh ka 12 tarik u Risaw ha Dorbar Hall ka Loompyrdi Ïongpiah, Jowai bad la wan ïashim bynta da ki bad khynnah ka District.
Kine ki dkhot ka WJHKA kiba la pynkhe im biang ïa kane ka jingïalehkai ki kynthup naduh u ma Alan Niangti, 2nd Dan Blackbelt uba dei u President ka WJHKA, u E. Manbha Kynjin, 1st Dan Blackbelt kum u General Secretary WJHKA, u Wyraiki Kharbukhi, Vice-President, u Yatha Chyrmang, Asst. General Secretary (1st Dan Blackbelt), u Pynioochwa Phira, Treasurer (1st Dan Blackbelt), u Ribait O Pde, Auditor (1st Dan Blackbelt) bad u Na oo Man kiwi War Passah 2nd Dan Black belt (Instructor).
Ha kane ka Special Training Camp kaba shi taïew lawan ban don lang da ki dkhot ka All Meghalaya Karate-do Association kynthup ïa u Donboklang Lyngdoh 5th Dan Blackbelt, nalor kiwei de ki dkhot ka Association .
La hikai ïa ki khynnah naduh ki rukom ki dustur jong ka Karate kynthup ïa ki Exercise, Punching, Kicking, Blocking, Self-Defense bad kiwei de ki lad kiba ïarap ban saiñdur ïa ka met ka phad.
Ha kane ka sngi pynkut la wan sakhi lang u ma Khroobok Passah, DSO, West Jaiñtia Hills kum u kongsan.
U Alan Niangti, President WJHKA ha ka jingkren ha kane ka sngi ula ong ka thong ban pynlong ïa kane ka Training ka long shi bynta ban pynkhreh ïa ka State Tournament ka ban long ha Shillong bad kumjuh haka Meghalaya Games ka ban hapoh ka District ha u snem 2025.
Shuh shuh ula ai ka jingïaroh ïa ki kmie ki kpa jong ki khynnah kiba la pynshlur ïa ki khun jong ki ban wan ïashim bynta ha kane ka Training Karate, u kyrman da ka jingtrei shitom jong ki kin wanrah ïa ka burom ïa ka District.
U Donboklang Lyngdoh, 4th Dan Blackbelt ula batai shaphang ka nongrim jong ka Karate kum kawei na ka ki jait jingïalehkai kaba lah ban ai jingmyntoi ïa ki khynnah bad haka juh ka por ki lah ban ri burom ïa ka akor ka burom bad kim dei ruh ban klet ïa ki jingpule.
Ula ong kino kino ki khynnah kiba doh shisha ïa ka sap ha ka Karate kin ïoh lad ban rung hapoh ka State Authority of India (SAI) ban ïoh jingpyntbit kham bha.
Katba u ma Khroobok Passah, DSO, West Jaiñtia Hills haka jingkren kum u kongsan ula pynpaw ka jingsngewkmen ba la ïoh ban pynkhe im biang ïa kane ka jait jingïalehkai hapoh ka District. Da kaba kitbok ïa ki nongïashim bynta ban kin ïoh ka jingjop ban wanrah burom haka Meghalaya Games 2025.
U la pyntip ruh na ka liang ka ophis treikam jong u ka long kaba kloi ban ïatreilang bad kane ka Association ban pynbha pynmiat shuh shuh ïa kane ka jait jingïalehkai ha kine ki sngi ban wan.
