Pynkheiñ ka VPP ïa ki jingkular pynïohkam ïa ki samla lada wan ha ka bor : Pala

Shillong Naiwieng 23 : U President ka Meghalaya Pradesh Congress Comittee (MPCC) u ma Vincent H Pala uba dei ruh u MP ba rim ka jylla u la kynthoh pyrshah ïa ka seng Voice of the People Party (VPP) kum ka seng kaba kren pyrshah ïa kiwei katba ka kyrtoh kylla sha lade namar kane ka deik a party kaba kren pyrshah ïa ka sorkar ba kam shym la pynskhem ïaki nongtrei Casual katba kane kajuh ka party kaba synshar ha Khasi Hills Autonomous District Council (KHADC) ka pyntreikam da kajuh ka polisi ban ym ithuh ne pynskhem ïa ki nongtrei casual ha katei ka council.
“ Ka VPP ka pyrta shla pyrshah ïa ka sorkar jylla kaba kyntait ban pynskhem ne ithuh ïa ki nongtrei casual hynrei kane ka juh ka party kaba synshar ha KHADC ka pyntreikam da kane ka juh ka polisi ryngkat bad ka jingkren pynksan pat ba ka jingleh jongki kaba dei. Kane ka pynishai kdar ba kaei kaba ki leh bad kren ka kyrtoh kylla sha ki ne ka lah ban long ba kim pat shemphang ei ei hynrei kaba kham sngewsih bad sngewdiaw ka long ba ha ka por election ki pynbiej ïa ki paidbah nongthep vote ba kin pynïoh kam lut lada wan ha ka bor mynta ba ki la wan ha ka bor ha KHADC ki leh pat da kumwei” ong u ma Pala da kaba ban shuh shuh “ Ki la shu pynbiej ïa ki briew da kaba pynngeit ba ki tang ïoh ban synshar kin pynïoh kam beit ïa ki samla”.
U ma Pala u la ïathuh ruh ïa ka jingeh ba ka KHADC ka ïa kynduh mynta ha ka liang ka pisa tyngka naduh ba synshar ka VPP. U la ong “ Mynshwa ka KHADC ka biang bha ka pisa tyngka hynrei kumba long mynta kam long shuh kumta kim shym don pisa satia. Ban ïoh pisa hap ban trei shitom, pynkhreh ïaki projek ba pher bapher bad phah sha ka sorkar pdeng ne sorkar jylla. Ka sorkar jylla ka pyllait ïa ka pisa kat kum ka jingphah projek bad kumjuh ruh ka Finance Commission ka la pynkup bor ïa kane naduh ka 13th Finance Commission”.
Haba kren shuh shuh halor kane u la ong “ Haba phi rah ïa ki projek jongphi ha khmat ka Finance Commission phi donkam ïaki riew shemphang ban pynkhreh ïa ki projek bad jingmang pisa bad ban pyni ruh ïa ki daw balei phi donkam pisa. Ki don ki projek jong ki Autonomous District Council (ADC) kum ka jingpynneh pynash iïa ka um, ki khlaw ki btap, ka kolshor, ban buh ïaki museum hynrei halor kane donkam ban biang ka rukom buh jingtyrwa ym ban shu shongklikti bad ap kmang ïa ka pisa”.