Nongpoh, Ïaïong 21: Ka Hynñiewtrep Achik National Movement (HANM) kum shi bynta ban dang bteng ïa ka jingshakri na ka bynta ka jaid bynriew ha ka jylla, kane ka seng mynta ka sngi ka la lah ban pynkha sa ïa kawei ka shnat treikam ba la ai kyrteng HANM Mawhati Zone, ha kaba u President ba rangbah ka seng u Bah Lamaphrang Kharbani u la shim ïa ka bynta ban pyntian smai bad pynskhem ïa ki nongïalama katei ka Zone.
Ïa kane ka jingïalang pynskhem ïa ki nongïalam ka Mawhati Zone la pynlong ha ka shnogn Laiphew Diengngan, ha kaba u President ba rangbah u Bah Lamphrang Kharbani u la pyntian smai ïa ki 25 ngut ki nongïalam bad ki dkhot kane ka HANM Mawhati Zone.
Kane ka dei ka sien kaba nyngkong eh, ba ka HANM ka la pynmih ïa ki Nongïalam ha ka thain Mawhati bad kum ka jingburom ïa kine ki nongïalam ba thymmai ha katei ka thaiñ, ka seng kmie ka la pynkup burom ruh ïa kine ki nongïalam da ki jaiñ ryndia ba kynthup ïa u Adviser, u Bah James Jyrwa, u Bah Reynold Dkhar, Presdident, u Bah Robie Jyrwa, General Secretary bad kynthup kiwei kiwei ki nongïalam kane ka Zone.
Haba kren ha kane ka sngi, u President ba rangbah ka HANM, u Bah Lamphrang Kharbani u la ai khublei kyrpang ïa kine ki nongïalam kiba la mih shakhmat ban pynïasoh sha ka seng ha ha ka sien kaba nyngkong eh ha katei ka thaiñ bad u khmih lynti ruh ba kine ki nongïalam kin shim ïa kata ka jingkitkhlieh kum ki nongïalam ban ai ïa kata ka jingshakri bad ban peit kyrpang ïa ka jingeh ki paradoh ki parasnam katei ka thaiñ Mawhati.
Ha kawei ka bynta, u la kyntu kyrpham ruh ïa kine ki nongïalam ba kin ai ïa ka jingshakri kaba hok na ka bynta ki paidbah kaba long ka burom ïa ka jaid bynriew bad ha kawei ka bynta ruh kum ki nongïalam kim dei ban sngap ïa kino kino ki jingkynthoh kiba pyrshang ban pyntroiñ ïa ka thong jong ka seng kaba angnud ban shakri bad ban ïada ïa la ka jong ka jaid bynriew, u la bynrap.
