Shillong, Naitung 18: Katto katne ki kali bad ka ïingskul, kila shah pynjulor ha ka miet sngi Palei, ha ki riew runar kiba la leit lun maw khlem daw ïa kine ki mar ha sor Tura.
Haduh 7 tylli ki kali kila shah pynjulor ha ki jaka ba kynthup ïa ka Upper Chandmari, Chitoktak, Bonepa, RC Road, Wadanang bad hajan ka St. Xavier’s School.
La ïathuh ba kawei ka jingkhang ïit jong ka ïing skul ka la shah pynpait bad ïa kane la lap da ki nongtrei jong ka skul hynne ka step sngi Thohdieng ryngkat bad u maw uba la lap hap katei ka kamra.
Watla katei ka skul ka don CCTV hynrei la pynlip noh ïa ki ha katei ka por ba shah pynjulor, kaba la pynlong ïaki bor pynïaid skul ban rai ban pyntreikam noh 24 kynta ïaki CCTV.
Ki kor CCTV kiba don hajan kila ïoh ring dur ïaki runnar hynrei haduh mynta ym pat lah ithuh ïa kiba donkti.
Ki Pulit ki ngeit ba ki nongleh kam sniew ki pyndonkam da ki scooter kiba don ki light ba shai khnang ban lait na ka jinglap ïaki.
U Superintendent of Police ka West Garo Hills u Abraham T Sangma u la pynthikna ïa kine ki jingjia bad u la ong ba dang bishar bniah ïaki video ba ïoh ring lyngba ki kor CCTV.
U SP u la ong ruh ba la pynkhlaiñ ïa ki jingpahara miet, da kaba pynbun ïa ki kynhun pahara daki kali.
Halor kane ka jingjia, la ujor 3 tylli ki FIR ha Chandmari Police Station. Hynrei, ka skul kam pat ujor ejahar.
Katto katne ki nongshong shnong ki la pynpaw ba ki jaka ba la pynjulor ki hap hapoh ka zone kaba ki nongshong shnong ki khot ka ‘Golden Triangle’, ka jaka ba la kynnoh ba ka don jingïadei bad ki kam khaïi drok.
