Shillong, Lber 29: Ka lyer kaba jur ryngkat bad u slap ha kine ki khyndiat sngi baladep, ka la pynjulor ïa kawei na ki ïing la rim bha ha Sohra, kaba la don naduh ka por jong ki Mishoneri ha Sohra.
Kane ka ïing kadei kaba la pyndonkam kum ka kamra bam bad kamra shet jong ki samla pule ka Thomas Jones School of Mission and Evangelism (TJSME) jong ka Balang Presbyterian ha Ri Khasi Jaiñtia.
U Rev. A. Dohpri, Principal kane ka Skul, u la ïathuh ba ka jingjur jong ka lyer ka la lied ïa ka tnum baroh kawei bad ka kamra bam kam long shuh ban pyndonkam. U la ïathuh ba ïa mynta shipor la pyndonkam noh ha kawei ka kamra ba dang shna thymmai.
Kane kadei ka jaka bam jong kumba 35 ngut ei ei ki Samla pule kiba wan pule pyntbit ha ki kam ïalap bad kam mishon na ki Balang bapher bapher jong ka Ri Khasi Jaiñtia.
U Pastor Principal, u kyrpad ïa ka jingïarap lem jong ki Balang bad kino kino kiba don mynsiem na ka bynta ban shna pynbha biang ïa kane ka kamra.
Lah ban kdew hangne ba ïa ka TJSME la sdang da ka KJP Assembly hadien ba la pynkynriah noh ïa ka Theological College sha Mawklot ha ka snem 1994. Ïa ki Class la pynlong ha ïing jong ka Cherra Theological College kaba la seng da ki Mishoneri na ri Wales ha ka snem 1887. Ki kamra ba ju pynlong Hostel ki samla pule Pastor mynba dang don ka College hangtei ki la kylla long noh ki Hostel jong ki samla pule mishon.
Naduh la seng ïa ka, ka TJSME, ka la pynmih bun ki samla shynrang bad kynthei kiba la trei kum ki Mission Worker ha kylleng ki Balang jong ka Ri Khasi Jaiñtia.
