Pynjot ka erïong ba jur bun tylli ki ïing, ki jingthung jingtep ha ki ar tylli ki shnong Ri Bhoi

Nongpoh, Naitung, 15: Bun tylli ki ïing ki sem bad ki jingthung jingtep ki la shah pynjulor ha ka eriong kaba la khie kynsan hynnin ka sngi ha ka por 2 baje ei ei mynsngi ha ka shnong Umdapdumu bad Umdaprangi ba hap ha ka Umling C&RD Block ha Ri Bhoi District.
Ha kane ka jingwan lynshop kynsan ka eriong, kumba 20 tylli ki ïing ki la shah pynjulor bad ki nongshong shnong ki la shah ktah ruh halor ka jingshah pynjulor ki jingthung ba kynthup naduh u kwai, tympew, ka kait bad kiwei kiwei ki jingthung ba la rep da ki nongshong shnong.
Nalor kitei ki jingshah pynjulor ki ïing ki sem bad ki jingthung ki jingtep, ka eriong ka la pynjulor ruh ïa kawei ka Kali bad ki paidbah nongshong shnong ki hap ruh ban shong ha ka jingdum ba ki sainar ilektrik ki la dkut bad don ruh ki post ilektrik kiba la kyllon ha ka jingwan lynshop kynsan kane ka eriong kaba jur.
Ha ka jingleit jurip ki nongthoh khubor, la lap ruh ba kane ka jingpynjulor ka eriong ka la ktah shisha ïa ki paidbah nongshong shnong ba bun ki longïing ki la duh ïa ki ïing ki sem, ki jingshah pynjulor ki jingthung bad ruh ba ki paidbah ki la hap ban shong ha ka jingdum ba la dkut lut ki sainar ilektrik bad la kyllon ki narpost ilektrik.
Haba ïa kren bad ki Nongthoh Khubor, u Rangbah Shnong Umdaprangi u Bah Alexander Maring bad u Rangbah Shnong ka Umdapdumu u Bah Julius Maring, ki la ong ba ka jingwan lynshop kane ka eriong ka la long shisha ka jingduhnong kaba khraw, ha kaba bun tylli ki ïing ki sem ki la shah pynjot bad kynthup ruh ki jingthung jingtep kaba la pynduhnong ïa ki paidbah nongshong shnong.
Halor kane ka jingjia kaba la shah ktah ki paidbah, kitei ki nongïalam shnong ki la buh ruh ka jingkyrpad sha ka sorkar ba kin wan ban tuklar lem ban jurip ïa kitei ki jingshah ktah ki nongshong shnong bad ruh ha kajuh ka por ki la kyrpad ruh ban thaw ïa ki lad jingïarap kiba mardor na ka bynta kito ki longïing kiba la shah ktah jur ha kane ka jingwan lynshop ka eriong.