Pynjop biang ïa nga kum u MDC ka Nongpoh ngan ïoh pyndep ïa ki kam ba dang sahteng – Kyrtong UDP

Nongpoh, Rymphang 15: Kum u kyrtong ka UDP na Nongpoh Constituency ha kane ka election MDC 2025, u Bah Balajied Rani haba ïalap election hynnin ka janmiet ha Nongpoh, u la pan biang ka jingkyrshan kaba pura na ki paidbah ka Nongpoh Constituency ban pynjop biang ha kane ka kynti ha kaba u dang angud ban shakri ïa ki paidbah bad ban dang pyndep ïa shibun ki mat kiba dang sahteng, kiba u kwah ban trei na ka bynta ka jaid bynriew.
“Kum u MDC na kane ka Nongpoh Constituency, u la dep ban kren ha ïing dorbar thaw aiñ ka KHADAC ïa shibun ki mat ki jura kiba donkam ban ïada ïa ka jaid bynriew” ong u Bah Balajied Rani, bad bynrap ruh kam long pat kaba suk ban pyndep tang hapoh kane ka shi samoi treikam hapoh ka KHADC, ha kaba u dang donkam ban dang kren ïa shibun ki mat ba kongsan ban kren kyrpang na ka bynta ki paidbah ka Ri Bhoi District” u la bynrap.
U la ong ruh ha ka jinglong MDC jong u, hapoh ka 6 snem, ym tang ba u la kren ïa shibun ki mat ki jura kiba ïa dei bad ka jaid bynriew, hynrei u la ju don ruh ha syndah ki paidbah nongshong shnong ka Nongpoh ha man la ka khep kaba ki donokam la ka dei ha ka sngewbha ne ha ka shipa.
U la pynpaw ruh kum u MDC u la pyrshang hi ruh ban wan rah ïa ki kam pynroi ha Nongpoh Constituency ha ka jingkotbor katkum ka MDC scheme bad kum ki paidbah ki dei ruh ban sngewthuh ba ka kamram u MDC kam dei tang ïa ki kam pynroi bad kaba kham kongsan ka long ba un kren ne ban wan rah ïa ki aiñ na ka bynta ban ïada ïa ka riti ka dustur bad ïa ka khyndew ka shyiap hapoh ka jylla.
Kumba u dang angnud ban dang shakri ïa ki paidbah bad ban dang pynurlong ïa shibun ki kam kiba dang sahteng, u Bah Balajied Rani u la pan ka jingkyrshan kaba radbah na ki paidbah ka Nongpoh Constituency ban dang pynjop biang ha kane ka kynti bad lada u wan biang ha ka bor un dang lah ban pyndep ïa shibun ki kam kiba dang sahteng kaba long ka jingmyntoi na ka bynta ki paidbah ka Constituency bad ha ka jylla hi baroh kawei, u la bynrap.