Shillong, Nailur 30: Ka Sorkar Meghalaya ha ka sngi Ba-ar, ka la pynmih ka jingpynbna ba kongsan ha kaba ïadei bad ka Chief Minister’s Scholarship Scheme (CMSS) 2025 hadien ka jingwan shakhmat jong ki samla pule ban aplai ïa ka scholarship.
Ka tnat Pule Puthi ka la pynshai ba ki samla pule kiba ïoh ïa ka CMSS kin dang ïai bteng ban ïoh ïa ka Post-Matric ST Scholarship bad kumjuh ruh ïa ki skhim bala mang kyrpang daka Sorkar Pdeng naka bynta ki samla pule.
ïa kane ka jingpynshai la pynmih ban pynthikna ïa ki samla pule bad ki kmie ki kpa ba ka jingaplai ïa ka CMSS kan ym khanglad ne pynduh ïa kiwei pat ki jingmyntoi.
Haba khmih ïa ka jingwan bha shakhmat jong ki samla pule ban aplai, ka Sorkar kala pynjlan ïa ka tarik ba khatduh ban phah ïa ki aplikeshon haduh ka 31 tarik u Risaw 2025.
Ka jingaplai jong ki samla pule ïa ka CMSS ka la bun bha bad tang hapoh shibnai naduh ba pyllait ïa ka, ka portal kala ïoh pdiang ïa palat 50,000 tylli ki aplikeshon na ki samla pule jong ki District bapher bapher ka Jylla Meghalaya.
Kane ka pyni ïa ka jingpaw bha jong ka skhim bad ka jingdonkam ha kaba kyrshan ïa ki jingangnud jong ki samla ban pule shaki kyrdan ba kham shalor.
Ka sorkar ka la kyntu ïa baroh ki samla pule kiba dei hok naduh kiba pule ia ka kyrdan klas XI haduh ka Ph.D, kiba pule ha ki jaka pule ba la ithuh hapoh bad shabar jong ka Jylla Meghalaya, ban shim ïa kane ka kabu bad ban aplai lyngba ka Meghalaya One portal hashwa ban kut ka por.
