Shillong, Nailar 01: Ka Ïingkashari Meghalaya High Court ka la pynjlan ïa ka jingshim bishar mukotduma halor ka jingkyrpad da ka Harijan Panchayat Committee (HPC) pyrshah ïa ka jingtyrwa ban pynkynriah ïa ki 342 tylli ki longïing ka Harijan colony na Them Ïew Mawlong.
Ha ka jingshim bishar ha ka sngi Thohdieng, ki nongsaid aiñ jong baroh ar kynhun ki la pyntip sha ka Ïingkashari ba kane ka kam mynta ka dangsah hakhmat ka Division Bench.
Haba phai sha kane ka jinglong jingman, na ka liang ka Ïingkashari ka la rai ba ïa kane ka kam yn sa shim bishar biang hadien jong ka 4 taïew.
“Ki nongïasaid aiñ kiba la mihkhmat na baroh ar kynhun ki la pynpaw ba kane ka kam ka dei kaba don ka jingïadei bad kaba dangsah hakhmat ka Division Bench ban pyndep noh ïa kane ka kam. Haba bishar ïa kane ka jingaiti, ka Ïingkashari ka la buh ban bishar biang ïa kane ka mukotduma hadien jong ka 4 taïew,” ong ka hukum na ka meij ba la khlieh da u Justice B Bhattacharjee.
