Pynjemkhnap ka Byndihati ïa ka Narpuh; 8 kol marwei thep ka Makrisha Songthiang

Jowai, Nohprah 09: Ka East Jaiñtia Hills District Football Association (EJHDFA) ka la ïoh ban sdang ïa ka lympung phutbol jong ki kynthei kaba la tip kum ka ‘Women’s League 2025’ hynne ka sngi Ba-ar (09 tarik u Nohprah) ha madan Artificial Turf, Diengshynrum, Khliehriat East Jaiñtia Hills District.
La plie pyrda ïa ka jingïalehkai ba nyngkong hapdeng ka Umshong SC pyrshah ïaka Jalyiah United SC. Kane ka jingïalehkai ka la kut ha ka jingïakhaid khlem don mano mano ba lah ban pynkhihjar (0-0) haduh kaba kut jong ka por ba la mang.
Watla ka jingïakhun kaba nyngkong kam shym la wanrah kano kano ka kol hynrei ha ka jingïalehkai kaba bud ka la long kaba pher bak ly bak, ha kaba ki thei ïalehkai jong ka Byndihati SC ki la jop kput da kaba pynliem haduh 14-0 kol ïaka Narpuh WWSC. Ka Makrisha Songthiang jong ka Byndihati SC, ka la long ka namtam ha kane ka jingïalehkai da kaba pynkhihjar marwei haduh 8 kol (6, 20, 24, 31, 42, 54, 60 & 79’) ban pynthikna ïa ka jingjop ha ka jingïalehkai kaba noh shiliang ka jingkhlaiñ.
Kiwei pat ki thei ïalehkai kiba la pynkhihjar ha kane ka jingïakhun ki long ka Charlinda Nongtdu, kaba la thep hat trick (12, 35 & 37’), ka Deimonmi Lyngdoh (23’), ka Happily Lyngdoh (55’) bad ka Diwakar Dkhar (77’).
Ha kane ka sngi sdang jong kane ka lympung la wan ban plie pyrda da u Bah James Sutnga, uba dei u General Secretary ka EJHDFA, ha ka jingdonlang ki  nongkitkam bad ki Dkhot ka seng kiba kynthup ïa u Bah Mehiwot Shadap (Working President), Bah Embhahlang Lamurong (Tournament Secretary), Bah Sookini Pohplet (members) nalor kiwei de bad ki riew ieit phutbol jong ka thaiñ.