Pynjari u DM-EJHD da ka aiñ Section 152BNSS bad ai jingbit ban pynpra ïa ki tiar tih dewïong be-aiñ ha Mynsangat

Khliehriat Rymphang 11: U District Magistrate jong ka East Jaiñtia Hills District, u Manish Kumar, IAS ha u kyrwoh khubor ba la pyllait mynta ka sngi u pynbna ba la pynjari da ki kyndon aiñ kiba hapoh ka Section 152 jong ka Bharatiya Nagarik Suraksha Sanhita (BNSS), 2023 ha ki jaka tih dewïong beaiñ kiba ha Mynsngat ha thaiñ Thangsko East Jaiñtia Hills District.
Katkum ki kaiphot ba la ioh pdiang na u Inquiry Officer ba la phah da u Superintendent of Police, East Jaiñtia Hills District sha ki bor district jong ka East Jaiñtia Hills District, ki bor pulit ki la pan jingbit na ki bor district ban pynjot pynpra noh ïa ki tiar tih dewïong ba kynthup ki crane kiba pynieng ha ki jaka tih dewïong ha Mynsngat ha thaiñ Thangsko East Jaiñtia Hills District, kiba la wanrah ïa ka jingiap bad jingmynsaw ki briew bad la pyntip ruh ba ki don lai haduh saw tylli ki thliew dewïong kiba dang don hajan katei ka jaka ba jia ka jingbthei bom Dynamite ha kaba la lap ba don ruh ki Dewïong kiba dang shu dep khlong thymmai na ki par kiba don hajan katei ka jaka ba bthei bom dynamite ha kaba kine ki par ne jaka tih Dewïong ki la pyndonkam da ki kor ki bor ne ki machine kiba heh ha kaba rah ïa ki crane bad ki tiar tih Dewïong bad ki crane kiba pynieng ki lah ban dei kiba pyndonkam ha kaba tih Dewïong beaiñ kiba buh jingma ruh ïa ki paidbah.
Katkum ka jingpyntip u District Magistrate la ong ruh ba ïa ka jingih Dewïong la khang pyrshah da ka National Green Tribunal naduh u snem 2014 ban lait na ka jingtih Dewïong beaiñ ha ka jylla, kumta u District Magistrtae, East Jaiñtia Hills District, Manish Kumar, IAS, kumba la pynkup bor u la pynbna ïa ka jingpynjari da ki kyndon aiñ kiba hapoh ka Section 152 jong ka Bharatiya Nagarik Suraksha Sanhita (BNSS), 2023 ha Mynsngat ha ka thaiñ Thangsko bad u la ai jingbit ruh ban pynpra ïa kiei kiei kiba long beaiñ kiba don ha ki jaka tih Dewïong ha katei ka thaiñ, kum ki crane, ki ïing rit (tents) kiba don ha Mynsngat ha ka thaiñ Thangsko bad kane ka jingpynpra kan long ruh hadpoh ka jingpeit jong u Investigating Officer bad la bthah ruh ba dei ruh ban da shon bad ki dur ha shwa bad hadien ba la dep pynpra bad ruh la bthah ba dei ruh ba leh bad ka Geo-tagging lem bad ki GPS ha ki jaka ba pynpra, shuh shuh ïa kane ka kam ban pynpra ïa kiei kiei kiba beaiñ ha katei ka jaka tih Dewïong beaiñ dei ruh ban da pynbiang bad ki jingthoh bad pynpoi noh kloi ïa ki kaiphot ha ka rukom lyngba ka Action Taken Report (ATR) sha ka ophis jong u District Magistrate ka East Jaiñtia Hills District.