Shillong, Risaw, 15: Ki bor synshar jong ka West Garo Hills District ki la pynjari da ka Section 163 Bharatiya Nagarik Suraksha Sanhita (B3N2) hadien ba la ïoh jingtip ba ki sengbhalang ki la khot pynlong da ka Non-Cooperation Movement kaba ar sngi ha rilum Garo ha ka 16 tarik bad 17 tarik mynta u bnai.
Ka hukum ba la pynmih da ka District Majistor ka la khang pyrshah ïa ka jingïalum briew beaiñ san ngut shaneng da kaba khang ïa ka leit ka wan jong ki kali, ban rah ïa ki dieng, ki maw, ki tiar siat ne kino kino ki tiar ba lah ban pynmynsaw bad ban phah khang ïa ki dukan, ki shlem treikam, ki ophis bad kiwei kiwei.
Kane ka hukum kan ym treikam satia na ka bynta ki bor shipai bad Pulit kiba don ha ka kamram.
Ïa kane ka jingbthah la pynmih na ka daw ba ka lah ban don ka jingpynthut ïa ka jingïaid beit ki kam ki jam ba manla ka sngi bad ban pynneh ïa ka shongsuk shongsaiñ jong ki paidbah.
Ka hukum ka la kdew ruh ïa ka rai jong ka Ingbishar High Court ba ki Bandh bad kino kino ki jingkhot pynlong pakhang shnong ki dei ki jingpynkheiñ ïa ki hok ba kongsan ba la ai katkum ka Article 19 bad 21 jong ka Riti Synshar ka Ri India.
Ka Ingbishar ka la bthah ïa ka Sorkar Jylla ban register da ka criminal case pyrshah ïa kiba pynkhein ïa kum kine ki hukum.
