Nongstoiñ, Nailur 11: U District Magistrate ka West Khasi Hill District, u bah Garod LSN Dykes IAS, u la pyntreikam da ka kyndon 163 of BNSS 2023, kaba khang bad mana ban pyndonkam da ki kynja plastic kum ki pla plastic kiba duna ia ka 120 micron, ki pla plastic ban rah jingrah ba duna ïa ka 60 GSM, ki plastic sheet ba pyndonkam ban thep ban song jingsong ba duna ïa ka 50 microns.
Nangta ki pela, ki klat, ki pliang, ki straw ki kynja shamoit, ki proh ne ki tari plastic, ki kynja plastic ban pynitynnad kiba shna da u Styrofoam (Thermocol), ki jingkhlong shkor, ki dieng plastic na ka bynta ki balloon, ki lama plastic, ki dieng plastic ba pyndonkam ïa ki jingbam thiang, ki plastic dieng ice-cream, ki invitation card ki packet plastic sikret, ki banner plastic bad kiwei kiwei.
La pynmih ïa kane ka jingmana namar ka jingpyndonkam ia kine ki kynja plastic, ka dang ïai bteng wat haba la dep ban khang pyrshah da ki bor ba dei khmih bad ruh ka jingpyndonkam ïa kine ki kynja plastic, ki wanrah ruh ka jingma ïa ka mei mariang. Kane ka hukum kan treikam mardor tad haduh ynda pynbna da kumwei pat.
