Pynjari kyndon 144 CrPC u DM ka EJHD ban ïada ïa ka krem Liat Prah, ka jingkieng bad ka surok

Khliehriat nohprah 14: U District Magistrate jong ka East Jaiñtia Hills District, u la pyllait ïa lai tylli ki hukum ba pynjari ïa ki kyndon aiñ 144CrPC na ka bynta ban ïada ïa kawei ka ken Liat Prah kaba don ha Shnongrim, kumjuh ruh na ka bynta ban ïada ïa ka jingkieng kaba dang shu dep shna ha shnong Shymplong bad ïa ka surok kaba ha shnong Lakaseiñ, kaba hajan Samasi, Umkyrpong ka ban poi sha Kseh.
Katkum ka hukum, la ong ba kumba la paw ha ki pathai khubbor, ka la don ka jingkynnoh ba ka don ka jingtih dewïong ha ki thaiñ Shnongrim kaba buh jingma ïa ka krem Liat Prah, kumta ban ïada ïa katei ka krem, ki bor district jong ka East Jaiñtia Hills District, ki la shim khia da kaba phah jurip ha ka kynhun kaba na ophis u Deputy Commissioner bad ong ba la lap ba ka don ka dak ba imat ki don kiba dang mut ban pyrshang ban tih tuh bad tih beaiñ ïa u dewïong ha katei ka thaiñ, kumta u District Magistrate u la pynmih noh da ka hukum 144CrPC kaba mana pyrshah ban tih dewiong ha katei ka thaiñ bad ban pyndonkam ïa kino kino ki tiar pynbthei bad ong ba lada donkam ban trei ïa ki kino kino kiwei pat ki kam kiba donkam ban pyntrei da ki tiar pynbthei, ki dei ban da pan jingbit lane ka clearance shwa na ka ophis u Deputy Commissioner.
Kumjuh ruh na ka bynta ban ïada ïa ka jingkieng kaba don ha khappud ha shnong Shymplong, katkum ka hukum la mana pyrshah ïa ki kali ban kit palat ïa ka 9 ton ka jingkhia.
Kumjuh ruh na ka bynta ban ïada ïa ka surok kaba don ha Lakaseiñ, Samasi, Umkyrpong, Kseh, kaba la iohjingtip ba ki don ki kali heh kiba kit palat pud kiba ïaid lyngba na kane ka surok bad kane ka jingkit palat pud ka wanrah ïa ka jingjulor ka surok, kumta katkum ka hukum la mana ïa ki kali heh ba kit jingkit ban kit palat ïa ka 9 ton ka jingkhia.
La ong ruh ba kitei ki hukum kin treikam noh mardor tat haduh ban da pynbna da kumwei pat.