Shillong, Iaiong 26 : Naba la ju don ka jingud na ka liang ki paidbah ba don ki briew kiba pyndonkam ia ki rukom khwai doh da kaba pynbthei bom, ki dawai bih, pynap jar/tyngsong bad kiwei kiwei ki rukom khwai doh kiba pynsaja ïa ki kynja kiba im hapoh ka wah Rimen, ba ïaid lyngba ki shnong; Umphniang, Um-hlew, Kalashandi, Shalai Malai, Iap Shynreh, Katraduwa, Dholai, Huru-Pukni, Joiram, Kharabri bad la ïoh sngew ruh ba don ka jingthang khlaw beaiñ khlem ka jingsngewthuh bad ka jingkitkhlieh ha kitei ki shnong kiba hap hapoh ka Malai Sohmat Syiemship bad ka Bhowal Syiemship kiba don hapoh ka East Khasi Hills District;
Naba kine ki jingleh jong ki kan wanrah ïa ka jingduhjait ki jingim hapoh ka um bad khyndew, ka jingjulor ka mariang bad nalor kata kan wanrah ruh ïa ka jingma ïa ka koit ka khiah jong u paidbah.
“Namarkata, katkum ka bor ba la pynkup ha nga hapoh ka kyndon ain Section 144 Cr.P.C, nga I Kong Isawanda Laloo, IAS District Magistrate, East Khasi Hills District, nga pynbna paidbah ba la khang bad mana tyngeh ban pyndonkam ïa ki rukom khwai doh kiba pynsaja ïa ki kynja kiba im hapoh ka um ha ki wah Umngot bad wah Umiew bad la mana ruh ban thang khlaw beaiñ ha kitei ki shnong kumba la kdew, kiba don hapoh jong ka East Khasi Hills District. Kum ki bor ba dei peit ïa ki shnong ki thaw, nga kyrpad ba lada phi lap ne tip ïano ïano baleh ïa kitei ki jait kam kumba la kdew haneng sngewbha ban pyntip kloi sha kane ka ophis bad yn pynshitom ïa ki katkum ka aiñ. Kane ka hukum kan treikam mardor naduh ka 25 tarik Iaiong 2022 tad haduh ban da pynbna pat da kumwei.
