Shillong, Risaw 09 : Ka sorkar jylla ka la pynjari da ka korphiw miet ha khappud Lapangap ban pyntikna ba kan ym mih shuh kano kano ka jingjïa kaba sngewsih hadien ba ka jingïakynad kaba jur kaba la mih kynsan katba ki nongshong shnong ka Lapangap ki dang leit ban ot kba na ki pynthor ha ryngkat ka jingsynran lang ki pulit ka Meghalaya bad kumjuh ki pulit ka Assam.
“Namar ka jingisyier ïoh ka mih biang ka jingkynad na ka liang ka sorkar Meghalaya ka la bthah ïa u Deputy Commissioner ban pynjari da ka korphiw khnang ban ïada ia kino kino ki jingjia kiba lah ban jia ha ka por mynmiet. Ngi la ïoh jingtip ba na ka liang ka sorkar Assam ruh ka la pynjarida ka korphiw ha ki jaka jongki shatai,” ong u Symbud Myntri Rangbah ka Jylla, Bah Prestone Tynsong haba kren bad ki lad pathai khubor.
La ïathuh ruh ba mardor hadien kane ka jingjïa na ka liang u Myntri Rangbah ka jylla u la ïa kren bad u Myntri Rangbah ka Assam bad ruh hapdeng ki Chief Secretary jong kine ki jylla kynthup wat hapdeng ki DC bad SP ruh.
“Kyrmen skhem ba kan ym don shuh kano kano ka jingjia kaba sngewsih kaban pynmih ïa ka jingbym shongsuk shongsain ha ka thain ha kine ki por bad ki sngi kiban wan,” la bynrap biang u Symbud Myntri Rangbah.
Shuh shuh la iathuh ba u la dep kren ruh bad u SP katei ka thain uba la pyntip ba ïa mynta ki bor pahara ki la biang ban pyntikna ïa ka shongsuk shongsain. Hynrei u la ïathuh pat ba ka tnad ka la pynap lypa ban phah shuh lada jia ba dang donkam ha kano kano ka por.
Ha kajuh ka por u District Magistrate ka West Jaiñtia Hills District u Abhinav Kumar Singh (IAS) ha ka sngi Palei ula pynjari syndon da korphiw miet hapoh ka kyndon Section 163 BNSS ka ban treikam naduh ka 6 baje janmiet haduh ka por 10 baje mynstep ha baroh ki bynta khappud jong ka District hapdeng ka Assam bad Meghalaya.
La pynjari ïa kane ka hukum shi bynta ban wanrah ïa ka jingshongsuk shongshngaiñ ban tehlakam ïaka jingïakynad ha khappud.
U District Magistrate u la khang pyrshah ïa kino kino ki briew ban ïaid ha ki bynta khappud kiba dang hap hapoh ka District, la khang ruh ban ïalum paidbah da ki kynhun palat ïaka 5 ngut, la mana ruh ban rah ïa ki tiar pynmynsaw ha kitei ki bynta khappud.
Kane ka hukum kan treikam mardor naduh mynta ka 9 tarik tad haduh ban da pynbna da kumwei pat.
