Pynjari ka DM da ka hukum BNSS ba kit palat pud na surok Nongthliew-Mawmih-Mawlyndep

Shillong, Ïaïong 22: Hadien ba la ïoh jingtip ba ki don ki kali kiba kit khia kiba kit ïa ki jingkit kiba la long palat ïa ka 9 ton ki ïaid lyngba ka surok Mawmaram-Nongthliew-Mawmih-Mawlyndep ha kaba kane ka la lam sha ka jingjulor ki bynta jong ka surok bad kaba long ruh ka jingma ïa ki nongshong shnong bad kiba ïaid lynti na ka daw jong ka jingkhim ka surok, na ka liang ka District Magistrate, East Khasi Hills District ka la pynjari da ka hukum hapoh ka Section 163 ka Bharatiya Nagarik Suraksha Sanhita (BNSS) kaba khang ban ïaid ïa ki kali kit khia ha baroh shi lynter jong kane ka surok ba dang hab hapoh u pud u sam ka East Khasi Hills District.
Kino kino kiba pynkheiñ ïa kane ka hukum kin shah pynshitom hapoh ka Section 223 ka Bharatiya Nyaya Sanhita (BNS). Kane ka hukum kan treikam noh mardor tat haduh ban da pynbna da kumwei pat.