Pynjari da ki kyndon 144CrPC ha EJHD ban tehlakam ïa ka jingthih maw tih shyiap na ki wah

Khliehriat jylliew 20: U District Magistrate jong ka East Jaiñtia Hills District, myn ha ka 14 tarik mynta u bnai u la pyllait ïa ka hukum bad pynbna ba la pynjari da ki kyndon aiñ 144 CrPC ha East Jaiñtia Hills District bad kane ka long ruh kum ka jingmana ban tih maw bad tih shyiap na trai jong ki wah
Katkum ka hukum, la mana ban tih maw ria, ban khlong maw bad ban tong ïa u shyiap na ki wah, namar kane ka pynsniew bad pynjakhlia ïa ki um ki wah, kumjuh ruh la ong ba ki par maw ruh ki dei kiba ju pynsniew ïa ki um ki wah, ym tang katta, ki maw, ki shyiap kiba tuid na ki par maw bad ki par shyiap bunsien ki ju tuid sha ki um ki wah bad kumjuh ruh ki ju khanglad ïa ki jingthung jingtep ba kin mih bad khie lung ha ki jaka ba long sharing, ha kajuh ka por kine ki ktah ruh ïa ki jingthaw ba don jingim kiba im ha ki um ki wah.
La ong ruh ba ka National Green Tribunal (NGT) kan long peitngor halor ka jingtih maw bad tih shyiap beaiñ.
Kane ka hukum ka la treikam naduh katei ka sngi bad ka dang treikam haduh mynta tat haduh ban da pynbna da kumwei pat.