Pynjari Curfew ki bor pynïaid distrik ka South West Garo Hills ban shngaiñ ka khappud

Shillong, Nohprah 10: Ka bor pynïaid distrik jong ka South West Garo Hills ka la pynjari da ka curfew ha ka khappud jong ka district kaba ïajan bad ka ri Bangladesh, da kaba pynpaw ka jingsngewkhia ïa ka jinglah ban don ka jingjam tuh na shilliang khappud bad kaba lah ruh ban wanrah ka jingma ïa ka jingshong shngaiñ ïa ki nongshong shnong.
Kane ka curfew, kan treikam naduh ka por 8:00 mynmiet haduh ka por 6:00 baje mynstep, kaba khang ïa ka ïaid ka ïeng shajan u pud u sam ka India Bangladesh, ka jingbat ïa ki tiar ba khlem ïoh bor ne ka jingïalang, ka jingrah ïa ki tiar kiba lah ban long ki tiar ban pynmynsaw hapoh ka 200-meter radius naduh u zero line.
Kane ka hukum ba la pynmih da ka ophis district magistrate hapoh ka kyndon Section 163 jong ka BNSS, kaba thmu ban ïada ïa ki kam beaiñ, ba kynthup ïa ki kam khaïi tuh bad ka jingrung tuh da ki kynhun kaikhlaw, bad ban pynneh ïa ka shongsuk shongsaiñ ha ka district, ka jylla bad ka ri baroh kawei.
Kane ka curfew kan neh hapoh ka jingtreikam tat haduh ban da pynbna da kawei pat ka hukum, ha kaba district magistrate kaba la kdew ïa ka jingwan ka jingkylla ha ka synshar khaddar hapoh ka ri Bangladesh bad kumjuh ruh kaba ma ïoh don ka jingbym shongshngaiñ bad dei halor kane ba la shim ïa ka rai ban pynjari ïa kane ka curfew.