Nongstoiñ, Nailar 1: U District Magistrate jong ka West Khasi Hills bah Garod LSN Dykes IAS, ha u kyrwoh khubor u la pynjari da ka kyndon 163 CrPc kaba khang bad mana pyrshah ïa ki briew, ki kynhun briew ban tih bad khlong shyiap ha shilynter jong ka wah Nongkhnum.
Kane ka jingtih bad khlong shyiap ha kane ka wah ka wanrah ka jingma ïa ki kynja ba im hapoh um bad ïa ki sawdong saw kun jong kane ka wah.
Halor kane kajuh ka kyndon u la pynjari bad khang pyrshah ruh ïa ka jingïaid jong ki kali heh kiba kit palat pud ïa ka 9 metric ton ha ka surok bad jingkieng Tyllang-Nongriat bad surok Nongstoiñ-Sangriang sha Nongkhnum.
Kane ka jingïaid jong kine ki kali kit palat pud, ka wanrah ka jingjot ïa ka surok bad jingkieng bad ka buh jingma ïa ki briew kiba pyndonkam ïa kine ki surok bad jingkieng. Kino kino kiba ïaleh pyrshah ïa kitei ki jingmana kin ngat ha ka jingpynsaja katkum ka kyndon 223 BNS Act 2023.
