Pynjari 163 BNSS u District Magistrate halor ka jingshalan be-aiñ ïa ki dohkha na Bangladesh

Mawkyrwat, 16 Rymphang : U District Magistrate jong ka South West Khasi Hills District, u la pynmih ïa ka hukum katkum ka kyndon aiñ 163 jong ka Bharatiya Nagarik Suraksha Sanhita (BNSS) halor ki khubor kiba la mih ha kaba ïa dei bad ka jingshalan be-aiñ ïa ki dohkha na Bangladesh bad ka jingshalan be-aiñ jong ki nongkhaïi dohkha khlem jingbit.
Kane ka jingpynmih ïa kane ka hukum ka dei hadien ba la wanrah jingtip na ki briew, kumta ban teh-la-kam ïa kiba kum kine ki kam be-aiñ ki buh jingma kaba khraw ïa ka jingshngaiñ jong ka ri, ka shongsuk shongsaiñ, ka koit ka khiah jong ki paidbah, bad ka jingmyntoi ka ïoh ka kot jong ka thaiñ. Kumta, da kane ka aiñ kan pynsuk ruh ban teh-la-kam ïa ka jingkhaïi tuh, ka jingkhaïi be-aiñ, bad ban pynkhlaiñ ïa ki aiñ kiba la don lypa.
Ym tangkata, da kaba pyrkhat ïa ka jinglong jingman bad ka jingdonkam ban shim ïa ki lad jingïada mardor, u District Magistrate jong ka South West Khasi Hills District, u bah B. Mawlong, IAS, ula pynjari da kane ka kyndon aiñ 163 BNSS hapoh jong ka South West Khasi Hills District ban peit pyrman kum ka jingkit, jingbuh, jingdie, ne jingsam ïa ki dohkha ba la wanrah be-aiñ na Bangladesh khlem ki kot ki sla kiba biang, nangta ka jingpyndonkam ïa kano kano ka kali, lieng, lieng kynda, ne kiwei kiwei ki tiar kit ban pynlong ïa ki kam be-aiñ ba la kdew bad ka jingïarap ban pynsangeh, ne pynsuk ban ithuh ïa uno uno u briew ne ka kynhun kiba donkti ha kum kine ki kam be-aiñ.
Ïa kane ka hukum la pynmih namar ka jingkyrkieh jong ka kam bad kan treikam noh mardor haduh ban da mih kiwei pat ki hukum.
Na ka liang ki bor pynïaid District ki kyntu ïa baroh ki paidbah nongshong shnong ba kin ai ka jingïatreilang bad ki bor ba dei peit bad ban kohnguh ïa ka jingbthah.
Kino kino ka jingpynkheiñ ïa kane ka hukum kin shah ha ka jingpynshitom.