Jowai, Nohprah 07 : Ka National People’s Party 1-Nartiang Block Constituency, ha ka 6 December 2024 ka la pynlong ïa ka jingïakynduh lang jong baroh ki nongïalam jong ka party kiba kynthup ïa ki dkhot ka Parent Body, Women Wing bad Youth Wing na ki unit bapher bapher ka constituency ka ba la long ha Hall Highwind Restaurant Thadlaskein. Ha kane ka sngi lawan ban sakhi da ki hajar ngut ki nongïalam jong ka party na ki Unit bapher bapher hapoh ka constituency.
ïa ka jingïalang la pynïaid da u bah Hamkom Khyriem President ka party bad la ïoh ïa ki kyntien pdiangburom na u bah Mutshwa Thabah, Secretary ka Party. La ïoh ruh ban pynithuh ïa baroh ki kyrtong (candidates) MDC ki ba ka party ka la jied ban aireng ha ka election sha JHADC ka ban sa long ha u snem 2025. Ki Candidates MDC ki ba ka party NPP 1-Nartiang constituency ka la jied ki long, na ka 6-Moodymmai-Nongkhroh u ma Jesse Suiam, na ka 7-Nartiang-Wahiajer ma Reforming Son Lamare, na ka 8-Moodop-Umladang ma Thombor Shiwat bad na 10-Mynsngat-Khanduli ma Pheinshwa Nanglein.
Nalor kine, ki don ruh ki MDC candidates jong ka NPP ki ba hap bad katto katne tylli ki shnong jong ka 1-Nartiang constituency kum u bah Ailad Bhoi (5-Mukhla -Ummulong) bah Evening Trom (9-Mynsoo – Nongjngi) bad u bah Aiborlang Shadap (12 barato- Mukroh).
Baroh ki candidates ki ba la ai jingkren ha kane ka jingïalang, ki la ai khublei ïa ka party ka ba la jied ïa ki ban mihkhmat bad ïa aireng ha kane ka election MDC sha JHADC ha u snem ban sa wan. Ki la kyrpad ruh ïa ki nongïalam jong ki unit bapher bapher ka party ba kin treishitom ban pynsngewthuh sha baroh ki nongshong shnong, ïa ki Nongrim bad ki kam ba ka party NPP ka la leh ha kine ki khyndiat snem ba ka don ha ka bor shynshar.
Ha kane ka sngi la ïadon lang ruh u ma Sniawbhalang Dhar, Deputy Chief Minister ka jylla bad MLA ka thaiñ, u ba la ai jingkren bad kitbok kit rwiang ïa baroh ki candidates jong ka constituency ba kin poi sha ka thong ka jingjop ha kane election MDC ban sa wan. U la kyrpad ruh ïa baroh ki nongïalam jong ka party ba kin trei shitom ban pynjop don bunrom ïa kine ki candidates ka party khang ba ki paidbah ka constituency kin ïoh bun ki jingmyntoi da ka ba kin ïoh ïa u MLA bad MDC na ka juh ka party.
Na ka liang ka party NPP 1-Nartiang Constituency, ka buh ka jingkyrpad rit sha baroh ki paidbah ka Constituency bad ka jylla hi baroh kawei ban ai ka jingkyshan ba pura ïa ka party NPP ha kane ka election MDC sha JHADC bad KHADC bad kyrmen ba ka party kan ai ka jingshakri ba khambha shuh shuh ha ki snem ki ban wan lada ka NPP kan poi biang ha ka bor shynshar, ong ki nongialam.
