Shillong, Nailar, 07: U MDC jong ka Mawlai Constituency u Bah Teiborlang Pathaw uba la trei shitom ha la i jong i bor iba rit, ban peit ïa ka bha ka miat bad ïa ka roi ka par jong ki shnong kiba don hapoh ka jylli jong ka mawlai Constituency, ha ka sngi Saitjain u la plie paidbah ïa ka lynti ïaid kjat ha ka shnong Umshing-Umjapung, ïa kaba u la mang pisa 5 lak tyngka lyngba ka skhim jong ka Khasi Hills Autonomous District Council (KHADC) bad ban maramot ïa ka surok kaba rim kaba la jot kaba la pynsuhsat ïa ki nongshong shnong ha ka leit ka wan bad khamtam eh ïa ki kali kiba ïaid lyngba na kane ka surok.
Ha ka jingplie ïa kane ka lynti ïaid kjat la sakhi lang da u Rangbah Shnong jong ka Umshing Umjapung u Bah CS Khongsar, ki nongkitkam shnong bad kiwei kiwei.
Ha kane ka sngi, u Bah Teiborlang Pathaw u la ai jingïarap ruh da ka song pisa sha ki nongrep kiba shong basah ha kane ka shnong khnang ba kin nang lah shuh shuh ban pynroi ïa ka rep ka riang.
