Shillong, Nohprah : U MLA ka Mawlai u Bah PT Sawkmie ha ka 8 tarik mynta u bnai u la pynpaw ka jingsngewkmen ba u la lah ban pynïoh skhim pynroi kiba dei ki surok na ka bynta ka shnong Mawkynroh-Umshing bad na ka bynta ka Dong Riattamdong, Mawlai Mawtawar.
Ha kaba ia dei bad kane u bah Sawkmie bad ki heh PWD ryngkat ki nongialam shnong ki la leit jngoh ïa kine ki surok ha Mawkynroh bad ha Riattamdong, Mawtawar ban khmih ïa ka jingshna ba kin ïaid sted bad ban shna bha ïa ki.
Haba ai jingkren u bah Sawkmie u la pynpaw ka jingkmen ban ïohi ba ka skhim shna surok ba 3 klur tam eiei ha Mawkynroh-Umshing ki la ïaid shaid shaid bad kumjuh ka Jal Jeevan Mission ka skhim sam kor um ïing ba 2 klur tam.U MLA u pyntip ruh kin sa shna noh ïa ka surok ha kawei na ki kyntoit ha Mawkynroh, lynti Mawlai bye pass.
Na ka liang u secretary shnong ka Mawkynroh-Umshing u bah L. Diengdoh u pynpaw ka jingsngew nguh ïa u MLA ba wan jngoh, ba ki kam kin ïaid sted hadien ba la ioh jingud jingnam na ki nongshong shnong. U pynpaw ba ka shnong ruh ka la shimkhia bha ha kaba ïa dei bad kane ka surok.
Kumjuh na ka liang jong u bah Hubert Kharkongor, rangbah dong ka Riattamdong, u ruh u la ai khublei bad pynpaw ka jingsngewnguh ïa u MLA uba la shimkhia ha kaba ïa dei bad ka surok ha dong jong ki.N alor kata ula pynpaw ruh ba ka dong ka la ïoh ar tylli ki surok mynta ka kynti ha ka jinglong MLA u bah PT Sawkmie.
