Pynïoh noh kham kloi ïa ka kali talasi drok bad ophis NCB, pynsngew ka Meghalaya ha u Special Monitor

Shillong, Naitung 07 : Ka sorkar jylla ha ka sngi Nyngkong ka la shong ïa ka jingïalang kaba kongsan bha ryngkat bad u Special Monitor jong ka National Human Rights Commission (NHRC), u Rakesh Asthana ban ïa kren na ka bynta ki ishu kiba ïadei ban pynkhlain ha ka jingïakhun pyrshah ïa u drok.
Ha kane ka jingïalang na ka liang ka sorkar la mihkhmat da u Symbud Myntri Rangbah ka Jylla, Bah Prestone Tynsong, nangta u Myntri ka tnad Social Welfare Bah Paul Lyngdoh, ki heh sorkar ka jylla, ka DGP nalor kiwei kiwei.
Lah ban kdew hangne u Asthana u dei ruh u Director General barim ki BSF bad ruh u khieh duh jong ka Narcotics Control Bureau (NCB).
Haba kren bad ki lad pathai khubor hadien ka jingïalang, u Nongai Ktien jong ka Sorkar, Bah Paul Lyngdoh u la ïathuh ba na ka sorkar ki la dep ban pynsngew bun bha kiei kiei la ka long naduh ka rukom ïakhun ïa u drok bad ruh ïa ki jingdonkam kiba bun ban pynkhlain shuh shuh ïa ka jingiakhun.
“Ngi la pynkynmaw ruh ïa une u Ophisar halor ka kali talasi (scanner vehicle) kaba ka sorkar jylla ka pan na ka sorkar pdeng na ka bynta ban buh ha ki khyrdop ban rung sha jylla na ka bynta ban talasi ïa ki kali ba rung sha ka jylla,” ong u Myntri.
Katkum ka jingïathuh jong u Myntri, ïa kine ki kali kiba bei tyngka da ka sorkar pdeng, na ka lïang ka sorkar jylla kam pat ïoh pdiang satia haduh mynta.
“Kumta, ngi la kyrpad ïa u Special Monitor ban tuklar bad buddien lang halor kine ki ar tylli ki kali kiba ngi pan na ka bynta ka jylla,” u la ong.
U Myntri u la ïathuh ba ka sorkar ka thmu ban buh ïa kine ki kali talasi ha ka khyrdop kaba don ha Ri Bhoi. U ïathuh ruh ba da ka jingdon jong kine ki kali yn talasi lut ïa baroh ki jingdon jingem kiba don hapoh watla i dei i tiar iba rit eh ruh.
Ha kajuh ka por u la ïathuh ruh ba ka sorkar jylla ka la phah tuklar ruh ha ka NHRC na ka bynta ban buh noh da ka tnad treikam jong ka Narcotics Control Bureau (NCB) ha Shillong. U ong ruh ba ki la tyrwa ban pynjlan noh ïa ka por ban set ia kito kiba hap hapoh ka PITNDPS Acts sha ka lai snem.
“La bthah ïa ka DGP ban buddien ïa katei ka kam bad ka NHRC khamtam haba u Special Monitor u wan khnang sha ka jylla na ka bynta ban peit ïa ka jingtreikam jong ka jylla halor kane ka bynta.”
Haba jubab pat halor ka jingkylli kaei kaba une u heh ka NHRC u kynthoh ne ong halor ka rukom ïakhun drok jong ka Meghalaya, na ka liang u Bah Paul u la ïathuh ba ki sngewkmen ban ïathuh ba wat utei u heh sorkar u ai ka jingïaroh ïa ka jylla.
“Nga sngewsarong ban ong ba wat u Special Monitor u la ai ka jingïaroh ïa ki sienjam ba ka Meghalaya ka shim ban ïakhun ïa u drok khamtam eh haba naduh ki nongshong shnong, ki kynhun niam, ki jaka pule ki wan ban snohkti lang. U da kdew ruh ba ka Meghalaya kadei kawei na ki jylla kaba don da ka DREAM Project na ka bynta kane ka jingïakhun. Kumta na ka liang jong u ruh u kular ba ka NHRC kan kyrshan lang ïa ka jylla ha kane ka jingïakhun.