Nongpoh, Naiwieng 10: Shibynta ban ai lad ïa ki khynnah skul ban pyni bad sei madan ïa ki sap ki phong jong ki, khamtam ha kaba ïadei bad ka jingstad saian bad ki buit treikam thymmai kiba thymmai, ka Lord’s Academy Secondary School, Umsawriang mynta ka sngi ka la pynlong ïa ka Science Exhibition halor ka phang “Innovation is the Key to the Future.”
Ïa kane ka jingïalang la plie paidbah da u MLA ka Umroi, Bah Damanbait Lamare, kum u Kongsan, ha ka jingïadonlang u Principal ka Lord’s Academy, Fr. Francis C, ki nonghikai, ki khynnah skul, ki kmie ki kpa, lem bad ki Principal jong ki skul kiba don marjan bad katei ka skul.
Ha kane ka sngi naka liang ki khynnah skul kila pyni ruh ïaka sap bad ka jingstad jong ki ban pyndonkam ruh ïaki tiar bapher bapher katkum ka jingstad saian, naduh ki tiar ki tar, bad ban batai ruh ha kano ka rukom la shna bad pynwandur ïaki haka jingïadei ka jingstad saian bad ka jingim ba man ka sngi.
Haba kren kum u Kongsan, u Bah Damanbait Lamare u la ai jingmynsiem bad pynshlur ïa ki khynnah skul ban trei shitom ha ki sap ba ki don, bad ban long ruh kiba don akor, kiba burom ïa ki nonghikai bad ki kmie ki kpa, khnang ba kin lah ban poi sha ka thong jong ka jingim.
U la iaroh ruh ïa ki bor pynïaid skul kiba la pynlong kum kane ka jingïalang kaba ai rynsan ïa ki khynnah ban pynpaw ïa la ki sap. U la bynrap ba lyngba kum kine ki rynsan, ki khynnah kin nang ioh mynsiem ban wad bñiah shuh shuh shaphang ka jingstad saian, kaba dei ka jingmyntoi bad ka jingkyrkhu na ka bynta ka lawei jong ki.
