Nongpoh, Rymphang 03: Ka Ri-Bhoi District Congress Committee (RBDCC) hapoh ka jingïalam u Bah Rocky Marweiñ kum u President lem bad ki dkhot mynta ka sngi kila mih paidbah sha surok kum ka jingïakhih ba jai jai ban pyrshah ïa ka jingpynkylla kyrteng ka sorkar BJP ïa ka skhim MGNREGA sha ka Viksit Bharat-Guarantee for Rozgar and Ajeevika Mission Gramin (VB-G RAM-G) Act, 2025.
Ïa kane ka jingïakhih ban pyrshah ïa ka jingpynlong aiñ ka sorkar BJP ïa kane ka skhim da kaba pynkylla thymmai ïa ka kyrteng bad ki kyndon hapoh jong ka la pynlong ha phyllaw ka Indoor Stadium Umlyngkdait ryngkat ki placard ban dawa ba dei ban pynneh bad pynim biang ïa ka kyrteng kaba rim.
Hadien ka jingïakhih pyrshah na ka liang ka RBDCC ka la leit ruh ban ïakynduh ïa u Deputy Commissioner ka Ri-Bhoi ha ophis treikam jong u ban ai da ka jingthoh halor ka jingpyrshah jong ki ïa ka jingpynlong aiñ ka sorkar BJP bad pynkylla kyrteng ïa ka skhim MGNREGA sha ka VB-G RAM-G Act, 2025.
Haba kren sha ki lad pathai khubor na ka liang u Bah Rocky Marweiñ President ka RBDCC u la ong ruh ba kane ka jingïakhih pyrshah la leh ha baroh kawei ka ri da ka seng Congress bad kum ka RBDCC ka la shim ïa kane ka rai ban ïakhih hadien ka jingbthah na All India Congress Committee lyngba ka Meghalaya Pradesh Congress Committee ban pyrshah ïa ka jingpynkylla kyrteng jong ka sorkar BJP ïa ka skhim MNREGA sha ka VB-G RAM G Act, 2025 hadien ba dang shen kila pynlong ruh ka jingïakhih ha Byrnihat.
U la pynshai ruh ba kane ka jingpynkylla kyrteng bad ki kyndon ha katei ka skhim ka la wanrah ka jingktah bad ka jingduhnong kaba khraw ïa ki nongbylla sngi bad ki paidbah da kaba ong ruh ba ka skhim MGNREGA haki 20 tylli ki snem ka jingïaid lynti ka la saiñdur ïa ki shnong ki thaw khamtam ki jaka nongkyndong ba ki paidbah kim donkam shuh ban leit wad bylla, hynrei ha kane ka aiñ thymmai ki paidbah kin duhnong shibun ïa ka hok jong ki bad ka BJP ka pyrshang ban pynbiej da kaba kyntiew ïa ka sngi bylla naka 100 sha ka 125 sngi namar ha kane ka aiñ thymmai ki VEC bad ki Dorbar Shnong kim don bor shuh kumba ju long mynshuwa bad naduh ba synshar ka BJP ki VEC bad ki job card holder kim ju ioh thikna ïaka pisa.
U la ong ruh ba watla dep ban pynlong aiñ ïaka VB-G RAM-G Act, 2025 kum ka seng Congress kan ïeng skhem ban pyrshah ïa kane ka aiñ thymmai bad haka 12 tarik kan sa don ka jingïakhih kaba heh ha ka jylla ban pyrshah ïa kane ka jingthmu ba rieh jong ka sorkar BJP.
