Pynim biang ka NHDC ïa ka jingdawa surokbah National Highway na Mawngap sha Baghmara

Mawkyrwat, ‘Nailur 12: Ka National Highways Demand Committee (NHDC) jong ka South West Khasi Hills District ha ka sngi Thohdieng ka la pynlong ïa ka jingïalang ba kyrpang ban ïathir bad ïatai halor ka jingdawa ban pynkhie im biang ban pynïoh ïa ka surok bah National Highway kaba dei ka surok ban pynïasoh ïa ka South West Khasi Hills District sha kiwei ki District kaba dei kawei na ki District Headquarter hapoh ka Jylla Meghalaya, ha kaba haduh mynta kam pat don satia ïa ka surok kaba paka kumba long kiwei ki distrik.
Ha ka jingïalang, la pynpaw ba ka Committee ka don ka jingthmu ban da dawa ba lada ïoh ïa ka surok bah National Highway kan long ka lynti ban pynïasnoh naduh Mawngap – Mawphlang – Weiloi – Laitmawsiang – Mawkyrwat – Rangthong – Nongnah – Khadphra Ranikor shaduh Baghmara. Ym tang kata lah ban ong ba kane ka surok ka long kaba kongsan bha ban ïoh jingmyntoi ki paidbah bad ruh ban kyntiew ïa ka roi ka par ha ka dong ka thaiñ.
Ki nongïalam ka Committee ki la pynpaw ba dei tang ka jingdon jong ka surok paka (National Highway) kaba lah ban weng ïa ka jingeh ba ki paidbah ba ki mad na ka jingduna lynti syngkien bad jingduh nong kaba khraw. Watla ka sorkar ha kine ki sngi ba la dep ka la pynbna ïa ka surok Intermediate naduh Lad Mawreng sha Keniong, hynrei kane kam pat biang satia.
Ka Committee ka la pynsawa biang ïa ka jingdawa kaba tyngeh na ka sorkar Jylla bad Sorkar India ba ka dei ban pyntreikam ne ban ïa ka surok bah National Highway kumba la dep ban pruit dak naduh u snem 2012 da ki riew paw khmat jong ka Jylla ha kaba ka la poi haduh ka sorkar India ruh.
Ha kane ka jingïalang la donlang ki nongïalam ka National Highway Deman Committee ba la lamkhmat da u bah Kynpham V Kharlyngdoh, ryngkat bad ki ‘riew rangbah, ki dkhot jong ki sengbhalang, ki Myntri Shnong, ki nongïalam na ki seng saiñ hima, ki nongñiah kali bad kiwei de, kiba la ïathir ban shim ki lad ki lynti treikam kumno ban pynurlong ïa kane ka jingdawa kaba la don lypa ka jingpruit dak da ki riew rangbah.