Nongpoh, Ïaïong 25: Naduh ki nongïalam shnong bad ki paidbah nongshong shnong ka Maikhuli ki da pynpaw shisha ka jingsngewbynud bad ka jing pyrshah jur halor ka jingïa pynbeit pud pynbeit sam hapdeng ka Meghalaya bad ka Assam, namar kawei ka pung Dohkha ba la ri la sumar da ka Shnong da ki spah snem la pynhap noh sha ka jylla Assam ha kane ka jingïapynbeit pud ba dang shen ha ka kyrdan jong u myntri rangbah ka Meghalaya bad ka Assam.
Kum ban pynpaw paidbah, ha kine ki sngi hadien ba la dep soi ïa ka soskular jong ka MOU hapdeng u myntri rangbah ka jylla Meghalaya, u Conrad K. Sangma bad u Myntri rangbah ka Assam, u Himanta Biswas Sharma ba la aiti sha u Myntri ka tnad ka kam pohing ka sorkar pdeng, u Amit Shah, ka phang kaba ki paidbah ki pyrshah bha ka dei ka jingpynhap wat ïa katei ka pung dohkha sha ka Assam bad kumba paw paidbah kiba bun ki nongshong shnong ha katei ka thain khappud ba hap ha ka Raid Marwet jong ka Hima Mylliem kim hun satia ïa kane ka jingïapynbeit pud da kaba kam ba bun ki jaka ka Meghalaya ki leit sha ka jylla Assam.
Ki jingshisha ki paw pyrthei ruh ha kaba hynnin ka sngi, ka dang don ka jingïalang paidbah bad ka jingïaid paidbah ha Maikhuli bad ka phang kaba ki la ïa kren bha ka dei katei ka pung Dohkha ba la ri la sumar da ka Shnong Maikhuli bad kaba pynlyngngoh ïa ki paidbah bad ki nongïalam Shnong kumno ka sorkar Meghalaya ka ailad wat ïa katei ka pung kaba la ri la sumar da ki shnong kan leit noh sha ka jylla Assam.
Ha katei ka jingïalang kaba la long hynnin ka sngi ha Maikhuli kaei kaba la pynpaw da ki paidbah nongshong shnong ki la pynrem jur ïa ka sorkar Meghalaya ba kam da bishar bniah halor kane ka kam pynbeit pud pynbiet sam bad kum ki paidbah ki la rai ban da lei lei ïa katei ka pung dohkha ba la ri la sumar da ka Shnong Maikhuli kin nym ailad ban ioh ka Assam bad kin ri kin sumar hi ïa katei ka pung kumba long baroh shi katta ba kane ka pung ka dei hok shisha ban don ha ka jingpeit jingkhmih ka shnong Maikhuli.
Shuh shuh, ha kane ka sngi, na ka liang ka shnong Maikhuli kum ban ïada ïa katei ka pung dohkha kaba la long trai da ka Shnong Maikhuli bad wat ïa katei ka pung la shna ne tei lyngba ki skhim sorkar ba wan na Meghalaya, ki la pynpaw ruh sha ka pyrthei ba kin nym ailad ban leit sha ka Assam bad ha kane hi ka sngi ki la leit sieh biang ïa ka Signboard ban pynpaw bad ryngkat ki jingthoh ba kane ka pung ka hap ha ka Shnong Maikhuli ha ka jylla Meghalaya
