Shillong, Nailar 09: Ka Sur Ka Bri U Hynñewtrep (SKBUH) ka la khot la wer ïa ki paidbah ka bri u Hynñiewtrep ba kin pynïeng ïa ka lama ïong ha ki ïing bad ki kali naduh ka 13 haduh ka 15 tarik kum ka dak ban pynpaw ïa ka jingpynrem ïa ka jingbym lah shuh ka sorkar ban sei madan ïa ka kaiphot shah siat ïap u Bah Cheristerfield Thangkhiew. Ka SKBUH ka la pynkhreh ruh ban pyni da ka Documentary Film halor ka jinglong jingim jong u Bah Che.
“Ka kynhun ka kyrpad ba naduh 13-15 Nailar ban wah lama iong ha ki iing ki kali, ki ar shaka, kum ka dak ba ngi pyrshah sorkar pynïap briew, namar kam pat shym la lah ban pynshitom, ban weng kam ïa kita ki nongpynïap briew kiba la dkhat jubor ïa ka jingim jong u Bah Cheristerfield Thangkhiew” ong u Bah Donboklang u Vice Chairman ka SKBUH.
U Bah Donboklang Kharlyngdoh u la ïathuh ba ba ka kane ka phlim kaba ka SKBUH ka pynkhreh shaphang u Bah Cherishtarfield Thangkhiew ka dei naduh ba u dang rit terter, mynba u dang don ha Bangladesh haduh ki sngi kiba khatduh jong ka jingim ha sla pyrthei bad ïa kane ka phlim yn pyni ha ka 12 tarik nailar ha Stand Bus ha ka por jan miet.
U Bah Donboklang u la ïathuh ba na ka kynhun ka la rai ruh ba kan pynlong ïa ka jingpynher baloon ïong ha Mawlai Stand Bus ha ka 13 tarik kaba dei ka sngi ba u Bah Cheristerfield ban pynrem ïa ka jingdkhat jubor ka sorkar ïa ka jingim jong u Bah Cheristerfield bad ka jingbym pynlait shuh ïa ka kaiphot tohkit halor ka jingshah siat ïap jong u wat hadien ba ka kynhun tohkit ka la dep aiti ïa ka kaiphot.
