Nongstoiñ, K’lyngkot 20: Ka sorkar Assam ka la sdang ban pyni bor biang ha khappud West Khasi Hills da kaba pyntrei ïa ka jingkieng heh lyngba ka wah Rambrai ha ka shnong Kyrshai. Halor kane u bah K.P.Pangñiang MLA barim ka Rambrai Jyrngam haba pyntip ha u nongthoh khubor, u la ong ba hadien ba u la ïoh jingtip na ki nongshong shnong, u la hiar sha katei ka jaka bad u la lap ba ka jingpyntrei jong ka sorkar Assam ïa katei ka jingkieng ka la ïaid sha khmat.
Ha kaba ïadei bad ka jingsdang jong ka sorkar Assam ban pyntrei ïa katei ka jingkieng, u la ong ba u da sngew lyngngoh haduh katta katta namar ha ka jingshisha, katei ka jaka ba shna jingkieng lyngba ka wah Rambrai ha Kyrshai, ka dei ka jaka ka ba dang don hapdeng jong ka jingïakren, namar bun phew tylli ki shnong kiba don shaphang shatei na katei ka jaka ba shna jingkieng ki dei kiba dang hap ha ka Langpih sector kiba haduh mynta ym pat pyndep satia ïa ka jingïapynbeit.
Ha kajuh ka por u la ong ba ha ka jingshisha katei ka jingkieng dei ka bynta jong ka sorklar Meghalaya ba kan pyntrei, namar ba ka hap lang ha ka two lane na Nongstoiñ Rambrai haduh Kyrshai. U la ong ruh ba ka jingpyntrei jong ka sorkar Assam ïa katei ka jingkieng ka dei namar ba ka sorkar Meghalaya kam shym la shimkhia.
U la ong ruh ba ka jingpyntrei ïa ka surok na Nongstoiñ Rambrai haduh Kyrshai, mynta ka dang poi tang haduh Mawthir namar ka dei ka jingpyntrei ïa ka wat kaba nyngkong kaba long laiphewsan kilomitar. Kaba dang sah kaba yn sa pyntrei biang ha ka wat kaba ar ka dang don sa sawphew kilomitar katkum ba la pruid dak ha ka Detail Project Report.
Katkum ka jingïakut jong ka sorkar Meghalaya bad Assam ka long ba ha shuwa ban pyntrei ïa kino kino ki project ha khappud baroh ar tylli ki sorkar jylla, ki dei ban ïapyntip mar kylliang. Hynrei halor ka jingpyntrei jong ka sorkar Assam ïa katei ka jingkieng ha Kyrshai, ka lah ban long ba ka sorkar Assam ka khlem pyntip satia sha ka sorkar Meghalaya. Wat ki bor pynïaid district jong ka Kamrup ruh kim shym la pyntip satia sha ki bor pynïaid district jong ka West Khasi Hills.
U la pynpaw ïa ka jingsngew lyngngoh balei ka sorkar Meghalaya ka shah ïa ka sorkar Assam ba kan pyntrei ïa ki project kiba heh ha ki jaka kiba dang don hapdeng ka jingïa kajia pud. Namar kumba long mynta ka sorkar Assam ka la sdang ruh bad pyntrei ïa ka surok na Kamphaduli shaduh Mirza lyngba ka Nawapara.
