Pynïasoh u pyrsa kurim u Dy. CM barim sha ka TMC ban aireng na Mawkyrwat Constituency

Mawkyrwat, ‘Nailur, 25: Ha ka sngi saitjaiñ jong ka taïew da ki hajar ki paidbah napoh ka Mawkyrwat Constituency ki la tuid ha ka jingïalang paidbah jong ka jingwan pynskhem jong ki heh ka Meghalaya Pradesh Trinamool Congress Party (MPTMC) bad ïa u kyrtong u Ban Sounder Strong Cajee uba dei ruh u pyrsa kurim jong u Symbud Myntri Rangbah barim u Bah Rowell Lyngdoh (bam kwai ha dwar u Blei) ban ïakhun ha Elekshon 2023 na Mawkyrwat Constituency.
Hashwa ban sdang ka jingïalang kum ka dak jong ka jingnang pynïar ïa ka jingtreikam u Dr. Mukul Sangma kum u nongïalam jong TMC u la khap ïa u ribon ban plie ïa ka ophis treikam ba thymmai jong ka Meghalaya Pradesh Trinamool Congress Mawkyrwat Block (MPTCMB) ha shnong Mawlangwir, South West Khasi Hills District shwa ban pynlong ïa ka jingïalang ha madan Saitjaiñ, Mawlangwir, South West Khasi Hills District.
U Dr. Mukul Sangma haba kren ha ka jingïalang nyngkong eh u la pynpaw ka jingsnewnguh ïa ki paidbah kiba la wan ban sakhi ïa kane ka sngi kaba kyrpang ban pynskhem ïa u kyrtong u ban sa mih ban ïakhun na ka Trinamool Congress Party na Mawkyrwat Constituency.
U la kren ruh ïa ki katto katne ki mat bad ki kam kiba u dang don ka jingïatreilang bad u (L) Rowell Lyngdoh, Symbud Myntri barim jong ka Sorkar Meghalaya la ka long ïa ki kam ban wanrah ïa ki kam hapoh ka Jylla Meghalaya bad shibun bah ki kam pynroi kiba long ka jingbha jingmiat jong ki paidbah ba bun balang bad khamtam eh ki kam pynroi kiba dei hapoh jong ka Mawkyrwat Constituency.
U la ong ruh ba ka jingleit jong u ha Mawkyrwat ka long ban ai mynsiem bad ban pynkhlaiñ shuh shuh ïa ka party TMC hapoh ka Mawkyrwat Constituency kaba dang thymmai kaba dei hapoh ka jinglamkhmat u bah Sounder Strong Cajee kum u kyrtong ha ka elekshon 2023. Namarkata, ka long kaba dei ba ki paidbah nongshong shnong jong ka Mawkyrwat ki ïai donkam ïa ka mynsiem jong ka jingïatreilang bad wanrah shuh shuh ki kam pynroi ha kiba bun bah ki kam bad khamtam eh ban pynïoh ka jingjop ha kane ka jingïakhun kaba la ap mynta shakhmat.
“Dei tang ki jingroi jingpar kiba lah ban wahrah ka jingjop hapoh ki jylla”, ong u Dr. Mukul bad ban wanrah ïa kita, kaba don ka long ba ki paidbah kin ai ka kti kamon ka kti kadiang ban pynjop ïa u kyrtong ba ka TMC ka la ïoh ban sei khnang ba ki jingthmu baroh kin long kiba sei soh bad ym shuh kum kane ka sorkar kaba mynta kaba la kular ban ai ki kam pynroi hynrei shu kular kai khlem lah ban pynurlong.
U bah Charles Pyngrope, MLA & President ka Meghalaya Pradesh Trinamool Congress Party (MPTMC) u la ong ba kum ka Ri bad ka Jylla baroh kawei mynta ka donkam shisha ïa ki nongïalam ki ban ïalam ha kaba dei bad ha ka jaka ban kiew shaphrang ha ki liang baroh. Namarkata, dei da kata ka lynti ba ka Trinamool Congress Party ka kwah ban sei ïa u nongïalam u don ha kata ka bynta bad uta u dei u bah Sounder Strong Cajee.
“Ngam dei shuh u briew uba dang thymmai ha kane ka dong ka thaiñ hynrei naduh ka por jong u (L) Rowell Lyngdoh ki la ju ïa long kiba ïatreilang ban wanrah ïa ki jingkylla ha kiba bun ki liang ka roi ka par jong ka konstitwensi baroh kawei”, ong u bah Charles Pyngrope.
Haba kren shaphang ka Trinamool Congress Party, u bah Charles Pyngrope u la ong ba ka dei ka party kaba peit ïa ki rit ki ria, ki kup shilliang ki sem shilliang, ki longkmie kiba shem ki jingjynjar ha ka jingim ka jong ki. Namarkata, u don ka jingkyrmen ba kane ka party kaba hapoh ka jingïalam jong u bah Sounder Strong Cajee kan sa ïoh ïa ka jingjop bad ai ruh ka jingkitbok kitrwiang da ka jingkmen ryngkat ki jingdwai ba U Blei Un long U nongïalam lynti ha ka jingïaid jong ki kaba manla ka sngi.
U bah Fabian Lyngdoh, MDC barim jong ka Ribhoi bad General Secretary ka MPTMC pat u la pynkynmaw ïa ki ar tylli ki rukom treikam ba kum ki nongïalam ki dei ban don kata ka long ka jingstad ban treikam bad kawei pat ka long ka jingshlur kum u nongïalam ban ïada ïa ka hok bad ka dur ka dar jong ka jaidbynriew baroh kawei. “Kaei ka daw kaba la pynlong ïa ngi ban wan noh bad ka TMC, ka daw ka long ba ka Congress ha ka India Level ka la sdang ban ran dien bad sdang troiñ namar ka BJP ka la don ka thong ba hakhmat eh ban pynduh syndon ïa ka Congress”, ong u bah Fabian bad kane ruh hapoh ka Jylla Meghalaya ruh ka la sdang paw dak jong ka jingnang troiñ. Namarkata, u la pynshai ha ki paidbah ba dei tang ka Trinamool Congress hi kaba don ïa ka thong ba hakhmat ban ïeng ïaleh pyrshah ïa ka BJP bad ong ruh ba kane ka Trinamool Congress ka dei kaba la sdang na Bengal ha kaba mynta ka la sdang ban kylla long ka National Party bad ruh ka party jong ki paidbah ne kylla long ka Regional Party.
Kane ka Trinamool Congress ka long National tang ha ka platform hynrei ym ha ki rukom treikam namar kam kwah ban wanrah tang kawei ka aiñ hapoh jong ka Ri India bad kam ïeng ruh halor ka niam kumba long ka BJP. Kumta ha kine ki sngi la donkam shisha ïa ki nongïalam kiba nang ban treikam bad peit ïa ka jingdonkam jong ki paidbah ym ki nongïalam kiba shu jler tang ka ktien bad kren ruh kum ki biej kumba ka la jia hapoh Assembly.