Shillong, Nailur 15: Ka NPP ha ka sngi Palei ka la ïoh ban pdiang Sngewbha ïa u Chairman ka JHADC u Dr Sankey Shangpung uba dei u MDC na Bataw Lakadong Constituency uba la jop na ka seng UDP bad ki nongïalam ka UDP na East Jaintia Hills bad ïa u Bah Sherborlang L Mawlong MDC ka Nongspung-Sohiong uba la jop na ka seng HSPDP. Ïa kine ki MDC kiba pynïasoh la pdiang sngewbha da u National President ka NPP uba dei ruh u Myntri Rangbah ka jylla u Conrad Sangma, u National Vice President u bah Prestone Tyngsong ha ka jingïadonlang u Dr WR Kharlukhi bad kiwei de ki nongïalam ka NPP.
Haba kren pdiang sngewbha ïa kine ki MDC u Myntri Rangbah u la ong ba kane ka jingwan pynïasoh jong ki kan nangpynkhlaiñ shuh shuh ïa ka thong ka party ban trei na bynta u paidbah namar ka thong bad ka jingangnud kaba ka party ka don kaba dei beit na bynta ka bit ka biang ki paidbah.
“Ka dei lehse kaba ka kupar ka la thoh ïa ngi ha kaba wat ka dohnud jong ka party bad jia ryngkat ba ka kyntien People ka ïoh jaka hapdeng eh na ki kyntien jong ka kyrteng ka NPP. Ka dei ka kupar ne ka dei ka jingjia ryngkhat ba ngi la ïoh ïa kane ka party kaba la seng ha Manipur kaba ym ju don ba bna shuh u PA Sangma u la shim pateng ha u snem 2012 na kaei kaba la seng ha ki snem 1980 tad haduh ba kan ïoh jingithuh syndon kum ka National Party” ong u Myntri Rangbah
U Myntri Rangbah u la ong ba lada ki peit na kiei kiba ka sorkar ka la leh ha kine ki snem kiba ka MDA ka pynphalang ïa ka kam bad ka matti ka NPP ha kaba u la ong naduh ka jingtei ïa ka surok kaba 2.2 KM man la ka sngi ka jingpalat kiba ïoh um bam haduh tyngkong ïing kaba na ki kyndiat hajar tylli eh mynta pat ka la poi palat ar lak.
Na ka liang jong u, u la ai ksai ruh ba u MLA ka Sohiong u Bah Samlin Malngiang uba la jop ïa ka ilekshon na ka seng HSPDP shen u sa pynïasoh noh sha ka seng NPP ha kine ki khyndiat sngi kiban a wan.
U Myntri Rangbah u la ong ba ha kaba ïadei bad ka Sohiong hi ka jingpdiang ïa u Bah Sherborlang ka dei tang ka jingsdang kaba rit eh bad kadei tang ka bynta ba nyngkong hynrei ka bynta ba ar kan sa jia shen.
Kane ka jingai ksai u Myntri Rangbah kam dei shuh kaba phylla namar na ka liang ki nongïalam ka HSPDP ruh kim ju ïoh kynduh shuh bad une u MLA jong ka wat hadien katto katne sien ba ki la pyrshang wad lad ban ïoh ïakren bad u.
