Pynïasoh NPP u Adviser ka UDP bad u President ka Congress, shimti u Martin M. Danggo kum u President ka Ranikor Block

Mawkyrwat, Lber 31: Ka National People’s Party (NPP) hadien ka jingiehnoh noh jong kiba bun ki nongïalam ba hakhmat kiba na kiwei pat ki party bad kiba la leit pynïasoh ïa lade bad kane ka party NPP la ïohi ba ka la nangkhlaiñ bad kyrmen ba jop suk ha kane ka elekshon jong u snem 2023, hynrei ha ka jingïaleh ym lah ban tip lypa mano ban jop bad mano ban rem namarkata donkam ka jingtrei shitom na baroh ki liang.
Ha kaba ïa dei bad kane ka bynta, mynta ka sngi ka 31 tarik u Lber, 2022 na ka liang ka National People’s Party (NPP) ka la ïoh ban pynlong ïa ka jingïalang hapoh ka madan jong ka Nolikata, Ranikor Civil Sub Division ha kaba ka jingthmu jong kane ka long ban pdiang burom ïa kiba dang wan pynïasoh thymmai sha kane ka party bad kumjuh ruh ban thaw thymmai ne re-constitute ïa ka NPP Ranikor Block.
Lah ban kdew ruh ba ka jingwan ban pynïasoh jong kiwei pat ki nongkyrshan sha ka party NPP ki dei ki nongïalam ba hakhmat jong ka United Democratic Party (UDP) ba la lamkhmat da u bah Lastborn Pariong, bad kiba na ka party Congress ba la lamkhmat da u bah P.K. Nongmin, President jong ka Ranikor Block Congress Committee (RBCC) bad kumjuh ruh kiba hapoh ka jingïalam jong ka kong Pelsy Snaitang kaba dei ka kyrtong barim na ka BJP.
Ïa ki nongkyrshan ba thymmai kiba la wan pynïasoh sha ka NPP la ïoh ba pdiang burom da u bah Gigur Myrthong, MLA/MDC ka Mawshynrut Constituency bad u Working President jong ka NPP ka Jylla Meghalaya bad u la pynpaw ka jingsngewkmen ba da ka jingwan pynïasoh jong ki ka la nang aibor ïa ka seng.
Haba bynrap ïa ka jingkren, u bah Gigur Myrthong, u la ong ba kane ka sngi ka long ka sngi ba kyrpang namar ban pdiang burom na ka bynta ki nongkyrshan ba thymmai kiba la wan ban pynïasoh ïa lade sha kane ka party NPP ka don ka jingkyrmen kaba khraw bad ka la nang ai mynsiem shuh shuh na ka bynta ki nongïalam ba hakhlieh jong kane ka party, namar ki don ruh ka jingkyrmen ba ha kane ka elekshon jong u snem 2023 kane ka party kan sa poi sha ka thong jong ka jingjop lyngba ka jingai ka kti kamon ka kti kadiang jong ki paidbah na manla ki jaka. U la ong ruh ka jingwan jong ki ha kane ka jingïalang ym tang beit ne sngap hynrei ki la wan da ka mynsiem ban ai ka jingkyrshan ba rad bah ïa kane ka party.
Haba kren ban pynskhem ïa u President ba thymmai jong ka NPP Ranikor Block kata ïa u Martin M. Danggo u ban sa long ruh kum u kyrtong na ka 35-Ranikor Constituency, u bah Gigur Myrthong u la ong ba une un sa long u nongïalam jong kane ka party bad un sa ïoh ruh ban jied pura ïa ki nongkitkam ki ban sa long ki nongtrei bad ki nongrah ïa ka khubor sha kiwei de ba ïa ka NPP Ranikor Block la dep ban thaw thymmai naduh mynta ka sngi ka 31 tarik u Lber, 2022.
U la pynkynmaw ruh ba haba ïaleh na kane ka party NPP bun ki jingshah kynthoh ba kane ka party ka dei tang ka party ‘Garo’, hynrei em kam long kumta, namar mynta kum ka party ka la jan dap san snem ha kaba kum u nongmihkhmat u la dep ban trei na ka bynta ka roi ka par jong ki paidbah nongshong shnong bad kumjuh ruh kum ki nongïalam kiba hakhlieh ruh ki la leh ïa la ka jong ka bynta.
“Lada u kpa u biang, lada u kpa u ieit ïa ki khun kaba mut ka kam ka jam ruh ka ïaid biang”, ong u bah Gigur Myrthong bad dei na kata ka daw ba lada don bun ki party kiba ïatreilang ha kane ka sorkar MDA, hynrei mynta la 4 snem tam ki kam ki jam ki long kiba ïaid beit namar ba u nongïalam ba hakhmat eh jong kane ka party u dei u briew u ba bha bad uba trei da ka mynsiem jong ka ieit. U la ong ruh ba kum ka party ka la poi sha ka thong ban pynkut ïa une u snem 2022 bad kyrmen skhem ruh ba kane ka party kan poi beit haduh ba kut ban ïatreilang ha kane ka sorkar MDA khlem kano kano ka jingdkoh.
Namarkata, ban pynkut u bah Gigur u la buh ka jingkyrpad na ka bynta ki paidbah ba wat pyrkhat bakla ba ka party NPP ka dei ka party Garo, hynrei ka la dei kawei na ki party kaba la ïoh ïa ka nam ba ka dei ka ‘National Party’ kaba la ithuh da ka sorkar India. Kumta ka long kaba donkam ba kum ki paidbah nongkyrshan ki dei ban ïai long kiba trei shitom ban pynpoi ïa ka party sha ka thong.
U bah Martin M. Danggo kum u President ba thymmai jong ka NPP Ranikor Block u ba la dep pynskhem mynta ka sngi, ha ka jingkren jong u u la ong ban pynpoi ïa ka party sha ka thong jong ka jingjop kaba donkam ka long lyngba jong ka jingïatreishitom lang, ka jingïasngewthuh jingmut bad jingïaburom iwei ïa iwei pat.
Ha kaba ïadei bad ka jingwan rung biang ha ka kam saiñ hima sima, u Martin M. Danggo u la pynpaw ba dei lyngba ka jingwan khroh jong ki katto katne ngut u sa shim ïa ka rai ban mih pyrthei biang sa shisien ban long biang kum uwei na ki nongïalam hapoh jong kane ka Ranikor Constituency. Namarkata, lyngba kane u la buh ka jingkyrpad ba kum ki la wan ban khroh ïa u, u don ka jingkyrmen ba na ka liang ki paidbah ruh kin ai biang ka kti kamon ka kti kadiang ban pynjop ha kane ka elekshon jong u snem ban wan.
U la ai khublei kyrpang ruh na ka bynta ki nongkitkam kiba rim kiba la trei shitom ha kine ki snem kiba la leit noh bad kyrmen skhem ba da ka jingïoh ban jied thymmai ïa ki nongkitkam nangne shakhmat kan sa long ka jingaibor na ka bynta ka party hi baroh kawei na ka bynta ban ïa ai reng ha ka jingïakhun.
Ha kajuh ka por u la ïathuh ruh ba shwa ban pynlong ïa kane ka jingïalang mynta ka sngi, ka la don ka jingïasngew-thuh bakla hapoh jong ka party namar ki don lai ngut ki nongïalam ba hakhmat eh kum u bah Kitborlang Nongrem, u Don Massar bad kumjuh u Martin M. Danggo. Ban pynshai ïa kane, mynta ka sngi u bah Danggo u la ong ba nangne shakhmat kam don shuh kaba kum kata ka jingmut, hynrei ka la don beit tang kawei ka kynhun kata ka dei ka party NPP kaba hapoh ka jingïalam jong u President ba thymmai u Martin M. Danggo bad ki nongkitkam jong ka.
Ha kane ka sngi la ïoh ruh ka jingkren lyngkot na ki ‘riew rangbah kiba dang wan rung thymmai ha ka party NPP ha kaba ma ki ki la ai ka jingkyrmen ba kin sa ai ka jingïatreilang bad trei shitom ban pynjop don burom ïa kyrtong na kane ka party ha une u snem u ban sa wan napoh ka konstitwensi.
Ïa ka jingïalang ha kane ka sngi la pynïaid da u Nelbi T. Sangma, ha ryngkat ka jingïadonlang u bah H.S. Diengdoh, MCS Retired jong ka Ranikor Civil Sub Division bad uba long mynta kum u kyrtong na ka NPP Mawkyrwat Constituency bad lem bad kiwei kiwei de ki ‘riew rangbah, ki longkmie longkpa bad kumjuh ruh ki samla.