Nongpoh, Nailur 02: Shuwa ba ki paidbah kin shim biang ïa ka rai ban pynthymmai ïa ki nongmihkhmat sha ka ïing Dorbar thaw aiñ ka jylla ha kane ka election jong u snem 2023, ki nongïalam ka UDP bad NPP na Umsning Constituency mynta ka sngi ki la wan ban pynïasoh noh sha ka party HSPDP na ka bynta ban kyrshan ïa u Bah Primson Makdoh kum u kyrtong ka HSPDP na Umsning Constituency.
Kine ki nongïalam ka UDP bad NPP kiba la wan ban pynïasoh mynta ka sngi sha ka party HSPDP ha ka jingïalang kaba la long ha Umjarasi ki kynthup ïa ki nongkyrshan ka UDP ha ka jingïalam u Bah Sumarlang Swer kum u Youth President barim ka UDP Ri Bhoi bad ki nongkyrshan ka NPP ha ka jingïalam ka Kong Bobby Khongsngi.
Ïa kitei ki nongïalam ka UDP bad ki nongïalam ka NPP la pdiang burom ïa ki sha ka party HSPDP da u President ka HSPDP Ri Bhoi District, u Bah Pynwanbor Sylliang ha ryngkat ka jingdon lang u kyrtong ka HSPDP na Umsning, u Bah Primson Makdoh, u State Youth President, u Bah Sandondor Ryntathiang bad kiwei kiwei ki nongïalam bad ki nongkyrshan ka party HSPDP na Umsning Constituency.
Kumba la pynpaw da u Bah Sumarlang Swer, u nongïalam barim ka UDP bad uba la wan ban pynïasoh sha ka HSPDP party, u la ong ba ka daw kaba la pynlong ïa u ban wan pynïasoh sha ka HSPDP ka dei halor ka nongrim ba u kyrtong ka HSPDP party u dei u samla uba don ka jingangnud ban wan rah ïa ka jingkylla na ka bynta ki paidbah ha Umsning Constituency bad ruh ba ka party HSPDP ka dei ka party kaba don ïa ka nongrim ban ïada kyrpang ïa ki trai muluk ki trai jaka bad ruh ban ïada ïa ka khyndew ka shyiap kaba long ka dawbah jong ka jaid bynriew.
U la ong ruh nga kwah ban ïa trei lang bad ka HSPDP na ka daw ba kane ka party ka dei kawei na ka party riewlum kaba la rim tam bad kaba la don bynta ruh ban ïa khun ban pynioh la ka jong ka jylla ha ka jingïalam jong u Maieid Hoping stone Lyngdoh, bam kwai ha Dwar U Blei.
Kitei ki nongïalam ka HSPDP naduh u President ka District, u Bah Pynwanbor Sylliang, u Kyrtong ka HSPDP na Umsning, u Bah Primson Makdoh bad u State Youth President, u Bah Sandondor Ryntathiang, ha kane ka sngi ki la pynpaw ka jingkmen ba kine ki nongïalam ka UDP bad NPP Ki la wan ban pynïasoh sha ka party HSPDP bad ka daw hi ka long ba ki wah ban wan rah ka jingkylla bad khamtam ban ieid kyrpang ïa la ka jaid bynriew ba kane ka party ka ieng ban shakri na ka bynta ka jaid bynriew bad ban ïada kyrpang ïa la ka riti ka dustur bad ka khyndew ka shyiap jong ka jylla.
Na ka liang kitei ki nongïalam nalor ba ki la kren halor shibun ki mat treikam jong ka party HSPDP, ki la kyntu ruh ïa kine ki nongïalam ba kin dang trei borbah ban pynkhlain ïa ka party khnang ba ka party HSPDP kan lah ban pynurlong ïa ki mat treikam ba ka party ka don ïa ka thong ban wan rah ki mat treikam kiba ïada kyrpang ïa la ka ri bad ka jaid bynriew.
