Pynïasoh da ki hajar ngut ki nongkyrshan UDP, NPP, PDF sha ka HSPDP

Mawkyrwat, Naitung, 10: Ka Hills State People’s Democratic Party (HSPDP) jong ka Mawkyrwat Circle ha ka sngi saitjaiñ jong ka taïew ka 09 tarik u Naitung, 2022 ka la ïoh ban pynlong ka jingïalang paidbah ban pdiang burom ïa ka jingwanrung jong u bah Medalsing Lyngdoh bad ki nongbud ban long ki nongkyrshan ba pura jong ka party kaba la pynlong ha madan jong ka Nativity Hall, Mawkyrwat.
Ha kane ka sngi na ka bynta ki nongkyrshan ba thymmai kiba la wan ban pynïasoh sha ka HSPDP Mawkyrwat Circle ba kynthup na ka People Democratic Front (PDF) ba la lamkhmat da u bah Hadrian Lyngdong Tongkhar bad na ka United Democratic Party (UDP) ba la lam khmat da u bah Medalsing Lyngdoh ha kaba la pdiang burom ïa ki da u President ka HSPDP Central Body, bah K.P. Pangniang.
U bah K.P. Pangniang, President ka Hills State People’s Democratic Party (HSPDP) Central Body ha ka jingkren jong u u la ïoh ban pynshai ïa ki katto katne ki nongrim jong ka party HSPDP naduh ba la sdang ïa ka ha kaba kum ka party kaba don ïa ka jingïaleh ban pynïoh ïa ka jylla Meghalaya naduh ki snem kiba la leit bad kane ka party mynta ka la jan dap 55 snem ha ka jingshakri ïa ki paidbah jong ka jylla. “Dei tang ha ka party HSPDP kiba don da ki spah ngut kiba la shah pynshitom da kaba shah set phatok ha ka sorkar Assam ïa ki briew jong ka party kiba la ïakhih ban ïoh la ka jong ka Jylla ha ki por ba la leit lyngba da ka jingïalam jong u (L) bah Hopingstone Lyngdoh bad kiwei de ki ‘riew ïaleh”, ong u bah Pangniang.
Ha kajuh ka por u la ong pynpaw ruh ba kum ka party hapoh jong ka Mawkyrwat Constituency ka la shah ieh khunswet bad shah iehbeiñ noh ha ki nongïalam jong ka tang ha kine ki khyndiat sngi, tang namar ba ki ki la leit ban pynïasoh ïa lade sha kiwei pat hynrei kum ka party ka sngewskhem ha la ka nongrim ba ka don bad haduh mynta ruh ka don shibun ki ‘riew rangbah kiba dang sngewthuh ïa ki nongrim ba skhem jong ka party. “Ban sakhi ïa kane ka jingskhem jong ki nongkyrshan, mynta ka sngi shibun ki ‘riew rangbah ki la wan shakhmat ban ai ka jingkyrshan kaba skhem watla hapdeng ki rai-eh rai-dam kum ki nongïalam ki la ïa tur ban ïaleh, u la ong bad kyrmen skhem ruh ba da jingtrei shitom u President thymmai ha ryngkat u bah Medalsing Lyngdoh lem bad ki nongbud jong u kin sa lah ban ban kaweh ïa ka lama jong u Sing ha u snem 2023.
Namarkata, ban ïoh kheit ïa u soh jong ka jingjop ha ka jingïaleh ka kongsan eh ka long ban trei shitom, don ka jingïasngewthuh jingmut bad don ka jingïatreilang ha ki kam baroh, ong u bah Pangniang.
Ka Kong Badariti L. Nonglait, President HSPDP Women’s Wing Central Body ha ka jingkren jong ka ka la pynkynmaw ïa ki katto katne ki kyntien kiba u (L) bah Hopingstone Lyngdoh u la kren ha ki por ba mynshwa ha kaba ïa dei bad ki jingeh ba ka jaidbynriew ba kan sa ïa kynduh bad mynta kita baroh ki la sdang ban urlong.
Ha ka jingkren ai mynsiem ïa ki paidbah nongkyrshan ka la ong ba kum ka party bad kum ki paidbah kim dei ban bynnud ïa ka jingmih noh jong u bah Renikton Lyngdoh Tongkhar na ka HSPDP namar une u rangbah u la leh bun kiei kiei kiba long pyrshah ïa ka riti pynïaid kam jong ka party da kaba ka la pynkynmaw ïa ki saw tylli ki kam ba u u la leh, kawei na ki ka long ba u la don kti ban pynskhem ïa ka jingpyntreikam ïa ka CAB ban wanrah ïa ki briew na Bangladesh ban long ki trai shnong ki jaka jong ka Ri Khasi, kawei pat, u la kyntait ban saiñ bad kyrshan ïa ki paidbah ha ka jingjia ba shah siat ha Mawlai.
Nangta, ka party HSPDP ka la ïeng bad ka la jop ruh ban ïada ïa ka mei mariang da kaba pyrshah ïa ka jingtih ïa u marpoh khyndew (uranium) hynrei une u rangbah pat u la paw kyrteng ba u don ïa ki Coke Factory ha East Jaiñtia kaba la long ka daw jong ka jingpynjakhlia ïa ka mariang bad kaba khadduh, u la kylla long u nongdie ri namar ha ka jingïa pynbeit pud bun ki shnong kim shah kynthup shuh ha ka Jylla Meghalaya, ka la ong.
`Kumta kum ki paidbah kim dei ban bynnud ïa kum kine ki briew, namar kiba bun hi ki nongmihkhmat mynta ki ju ïapeiñ ïa ki nongrim tang na ka daw jong ka shuki. “Uba shet kylla un sa kyllon hi”, ong ka kong Badariti.
Ha ka jingkren jong u bah Medalsing Lyngdoh, Working President ka HSPDP Mawkyrwat Circle bad ruh kum u kyrtong na ka HSPDP Mawkyrwat Constituency u la pynpaw ka jingaikhublei na ka bynta ki paidbah nongkyrshan jong ka party bad kumjuh ruh ki nongïalam jong ka Central Body kiba la poi lang ha kane ka jingïalang kaba long shisha ka jingaimynsiem na ka bynta jong ka party ban i ïa ka jingkyrmen ha u snem 2023.
U la pynshai ruh ba kiba wan ban pynïasoh ban long ki nongkyrshan ba pura ha ka HSPDP ki long na ka UDP, NPP bad kumjuh na ka PDF. Namarkata, u la pynpaw ruh ba kaei kaba pynlong ïa u bad ka kynhun ban rung noh sha ka party HSPDP ka long hadien ba ka la don ka jingbym ïa sngewthuh jingmut bad ma u bad u bah Nolip ki la don ka jingïakren ba sani bha bad dei na kata ka daw mynta ka sngi ka 9 tarik u Naitung, 2023 ki la rung ban kyrshan ïa ka HSPDP.
Kumta ka long kaba donkam ba nangne shakhmat kum ki paidbah nongkyrshan baroh kin leit ha la ki jong ki shnong ki thaw ban ïawer ïaluh ïa ki paidbah ban ai ka jingkyrshan na ka bynta ka party HSPDP khnang ba kan ïoh jingjop ha kane ka elekshon jong u snem 2023.
Ha kane ka sngi da ki hajar ki paidbah ki la wan tuid ban sngap ïa ki jingkren jong ki nongïalam ba hakhmat jong ka Party HSPDP ha kaba ïa ka jingïalang la pynïaid da u bah Panborlang Ryntathiang bad ki nongkren ha kane ka jingïalang ki kynthup ïa u bah Nolipstar Lyngdoh, bah K.D. Wanniang, bah S. Lyngdoh Paliar, bah Kolan Marweiñ, bah Hadrian Lyngdoh, ka kong I. Kharbani kyrtong jong ka HSPDP Mawhati Constituency, bah Pynwan Shylliang, bah Witting Mawsor bad u bah Donalbest Nongsiej uba la ai ka jingkren khublei.
La pynshit pynshngaiñ ïa kane ka sngi da ka jingrwai Ri Khasi-Ri Khasi na ki samla pule na ka shnong Mawlangwir, ka jingshad na ka PHL Group bad ka jingrwai kyrpang na u Fedrick Lyngdoh Tongkhar.