Nongpoh, Naiwieng 06 : Ki nongïalam ka Ri-Bhoi Youth Federation (RBYF) sengkmie, mynta ka sngi kila hiar sa sha ka shnong Umsohlang Lumroman ban pynskhem sa kawei pat ka unit ba thymmai jong ka seng kaba la tip kum ka Umsohlang Lumroman Unit.
Ha katei ka jingpynskhem ïaki nongkitkam ba thymmai jong katei ka Unit la wan ruh ban shim bynta da u Bah RJ Thangkhiew Political Secretary u ba la shim ruh ka bynta ban pynbam smai ïaki dkhot ba thymmai, ki dkhot ka RBYF Sengkmie naduh u Bah Bawan Marweiñ, Neversad Makdoh, Liander Nongshli, PP Kylla haka jingdonlang u Bah Shanbha Sohtun Rangbah Shnong bad kiwei kiwei.
Ki nongïalam ba thymmai jong ka RBYF Umsohlang Lumroman Unit ki kynthup ïa u Samla Samuel Kharthangmaw kum u President, u Samla John Lyngdoh Secretary bad kiwei kiwei ki nongkitkam.
Ki nongïalam ka seng RBYF haba kren ha katei ka sngi kila pynpaw ka jingsngewkmen ba ki khun samla kila wan ban pynïasoh bad ka seng RBYF naka bynta shibun ki dawbah ban shakri haka imlang ka sahlang khamtam ka shnong ka thaw.
Ki la kyntu ruh ïakitei ki nongïalam ba thymmai ba ki dei ban long ki samla kiba don ka jingkitkhlieh ïaka shnong ka thaw ban long ruh ka nuksa ïaki para samla, namar ka RBYF ka trei bad shakri naka bynta ka bha ka miat jong ki paidbah bad ka imlang ka sahlang ym ban shim kabu bad ban leh kino kino ki kam kiba pynjahburom ïaka seng.
