Mysuru, Risaw 18: Ka kynhun jong ki nongthoh khubor na Meghalaya bad Tripura, kum shi bynta ka Press tour kaba dang ïaid shakhmat, ba la pynlong da ka Press Information Bureau, Shillong, ki la leit jngoh ïa ka Karnataka Silk Industries Corporation Ltd. (KSIC) kaba don ha Mysuru. Ka jingleit jngoh ka la ai ïa ki nongthoh khubor ïa ka jingshem kaba jylliew shaphang ka jinghiar pateng, ka jingtrei kti bad ka jingpawnam jong ka Mysore Silk, kawei na ki rukom thaiñ jaiñ ba pawnam bad ba itynnad bha jong ka India.
Ïa Mysore Silk Weaving Factory la seng ha u snem 1912 da u Maharaja Sri Nalvadi Krishnaraja Wodeyar ban pynbiang ïa ki jaiñ silk kiba bha na ka bynta ka ïing syiem. Da ka pateng kaba la neh palat 126 snem, kane ka karkhana mynta ka ïeng kum ka dak kaba sngew sarong jong ka jingtbit jong ka India ha ka kam jaiñ. Ha kaba sdang la buh tang da ki 10 tylli ki kor thaiñ jaiñ, suki suki ka unit ka la nang kiew sha ka 138 tylli ki kor thaiñ jaiñ katba nang mih ki sngi. Ki kor thaiñ jaiñ bad ki mashin pynkhreh, kiba la wanrah na Switzerland, ki long kiba nyngkong eh ha India. Hadien ka jinglaitluid jong ka ri India, katei ka karkhana ka la hap hapoh ka jingpynïaid jong ka Tnad Mysore State Sericulture, shwa ban pynkylla sha ka KSIC ha u snem 1980, ha kaba ka dang ïai bteng ban treikam kum ka karkhana sorkar.
Ha kane ka jingleit jngoh ïa ka karkhana, la ai ka jingbatai kaba bniah ïa ki nongthoh khubor da u Krishna Kumar, Dyeing Master ha KSIC, uba la batai ïa kawei pa kawei ka kyrdan jong ka jingpynmih silk. Naduh ka jingpynkhuid ïa ki jingbitnah bad ka jingwiehrong ka bym ktah ïa ka mariang jong ki ksai mulberry silk haduh ka rukom thaiñ kti kaba jem bha kaba kynthup ïa ka zariksiar bad rupa ba shisha, ki jingbatai jong u Kumar ki pyni ïa ka jingïasohlang ka jingtbit tynrai bad ka jinglong thikna jong ka teknoloji kaba don ha man la ka jaiñ silk jong ka Mysore.
Ka unit jong ka KSIC ka pynmih kumba 350 tylli ki sari man ka sngi. Kawei pa kawei ka saree Mysore Silk ka long kaba pher ym tang da ka nongrim ba riewspah bad ki rong kiba itynnad hynrei da ka jingpyndonkam ruh ïa ka zariksiar ba 22 karat. Katkum ka jinglong jingman jong ka jingsaiñdur bad ka jingdon jong ka zari, ki saree ki shong dor hapdeng T. 18,000 haduh T. 2.5 lak. Ka showroom jong ka karkhana ha Mysuru ka khring ïa ki paidbah kiba bun man ka sngi, ha kaba ki nongthied ki ju ïeng laiñ dang step, kaba pynlong ïa ki mar ban die noh tang hapoh khyndiat kynta. Kane ka jingdawa kaba jur kam dei kaba jujia katkum ka aïom hynrei ka dei kaba ju jia man ka sngi, kaba pyni ïa ka jingpawnam bad jingshaniah jong ka brand kaba la tei ha ki phew snem.
Katba ki dang peit ïa ka riti dustur ba riewspah jong ka Mysore Silk, ki nongthoh khubor na Meghalaya ki la shim ruh ïa ka kabu ban pynpaw pyrthei ïa ka silk tynrai jong ka jylla jong ki, ka Eri Silk, kaba la tip ruh kum Peace Silk namar ka rukom pynmih jong ka, ka bym ktah ïa ka mariang. Ka la rung jylliew bha ha ka kolshor bad ka jinglong jong ka thaiñ shatei lammihngi, ka Eri Silk ka pawnam na ka bynta ka jinglait lyer, ka jinglah ban neh bad ka jingjem.
Ki nongthoh khubor ki la ïakren halor kumno ban pynpawnam shuh shuh ïa ka Eri Silk bad ban lah ban kamai ha kylleng ka ri. Ki la kdew ruh ba katba ka Mysore Silk ka dei ka kyrteng kaba la pawnam bha bad kaba la ithuh ha ka pyrthei, ki silk tynrai kum ka Eri ki don kajuh ka lad lada ai ïa ka jingpynpaw kaba biang bad ka jingkyrshan jong ki tnat treikam.
Ki nongthoh khubor ki la pynpaw ba kum kine ki jingleit jngoh ki plie ka lad kaba kongsan na ka bynta ka jingïasam ïa ki kolshor bad ki ïarap ïa ki nongthoh khubor ban ïoh ïa ka jingsngewthuh kaba kham jylliew ïa ki rukom shna jaiñ kiba ïar bad kiba pher jong ka India. U la bynrap ruh ba ka jingpyni ïa kine ki karkhana tynrai kam dei tang ba ka pynneh pynsah ïa ka kolshor hynrei ka plie lad ruh ïa ka jingkiew ka ïoh ka kot bad ka roi ka par kaba ïaineh.
Ka jingleit ki lad pathai khubor kan bteng da ki jingïakren kiba kham bun ha kylleng ka Karnataka, kaba ai ïa ki nongthoh khubor ïa ka jingïohi kaba kham jylliew shaphang ki jingnohsynñiang jong ka jylla ha ka kam karkhana, ka kolshor bad ka histori.
