Pyniap dusmon u kurim ïala ka kurim da kaba ksih da ka jaiñ na ryndang

Khliehriat Jylliew 30: U runar uba la tip kyrteng kum u Plom Dkhar uba na ka shnong Jalyiah, East Jaiñtia Hills District u la pyniap dusmon da kaba ksih ïa la ka jong ka kurim, ka kong The Siangshai, 43 snem kyrta, la antad ba u la leh ïa kane ka kam triem ha ka por ba dang miet synia, ha ka met jong katei ka longkmie la lap ruh ba don ka dak mong ha ka ryndang jong ka.
Katkum ka ejahar ba la buh da u bah Phrangki Siangshai, uba dei u hymmen jong ka (L) The Siangshai, ba la ujor ha Women Police Station Khliehriat, la ong ba u dang ioh jingtip ïa ka jingshah pyniap ka para jong u ha ka por kumba 3 baje mynne mynstep bad kumta mar mar ki la ïa leit sha iïng ka para bad ki lap ba ka para jong ki ka kong The Siangshai ka la iap.
Ki thymmei khubbor ki iathuh ba utei u runar, u bah Plom Dkhar, u la ksih ïala ka jong ka kurim da ka jaiñ na ryndang, kata ha ka por ba dang synia bha ha kaba baroh ki khun ki dang iohthiah lyngngai bad hadien ba u la leh ïa kane ka kam runar, u la phet noh nala iïng bad u la phone sah u khun uba la kham heh bad u la iathuh ba u la pyniap ïa la ka men kmie kaba dei ka kurim jong u, kumta hi mar mar uta u khun uba la kham heh u la pyntip sha kiba ha iïng ha sem.
La ong ruh ba katei ka longkmie kaba shah pyniap ka don shiphew ngut ki khun bad iba dnag rit i dang hapoh 3 snem kyrta.
Ki pulit ki la pyndep mynta ka sngi ïa ki kam kiba sah kiba katkum ka aiñ bad la pyndep ruh ïa ka postmortem ha Khliehriat Civil Hospital bad mynta ka sngi hi ïa ka met ba sah jong katei ka longkmie la aiti noh sha kiba ha iïng ha sem.
La ong ruh ba na ka liang ki pulit ki dang thwet ban iohkem ïa u bah Plom Dkhar uba la pyniap ïala ka jong ka kurim.
Na ka liang ka Dorbar Shnong Jalyiah, lyngba u Waheh Shnong Jalyiah, u bah S.Dkhar, la ong ba ka Dorbar Shnong Jalyiah ruh ka pynrem jur ïa utei u runar uba la nud ban shim ïa ka mynsiem ba kordor jong kakurim jong u bad na ka liang ki bor shnong ruh ki kyntu jur ïa ki bor pulit ba kin kem mardor ïa u bad pynshitom bad pynsajia ïa u katkum ki kyndon aiñ.