Pynïap biej ka rukom noh ka um saw kyrdan ha kshaid Tangnub, sdang ka Tangnub Music Festival

Khliehriat, Risaw, 17: Ka kshaid Tangnub kaba don ha ka shnong Lumshken, East Jaiñtia Hills District ka dei ka kawei na ki kshaid kaba itynnad kaba don lai bad saw kyrdan ka rukom noh jong ka um ha ka kshaid.
Ka jingithiang jong ka kshaid ka la pynïap biej ïa u Deputy Commissioner, u Shivansh Awasthi uba la ong ba um shym poi pyrkhat ba kane ka kshaid bad ki sawdong sawkun kin long ki jaka kiba itynnad.
Ban khring ïa ki nongjngohkai pyrthei sha kane ka kshaid, ka Dorbar Shnong Lumshken ka la pynlong ïa ka tamasa ‘1st Tangnub Musical Festival’.
Ym lah ban len ba ka jingitynnad jong ki lum ki wah bad ka jingdon ka kshaid Tangnub ha shnong Lumshken kan sa lah ban khring ïa ki nong jngohkai pyrthei na jan bad na jngai bad ïa ki riew ieid mariang ban wan jngoh ïa ka shong Lumshken ha East Jaiñtia Hills District.
U MLA jong ka Khliehriat Constituency Bah Kyrmen Shylla haba kren kum u kongsan ha kane ka tamasa u la ai ka jingïaroh ïa ka jinglah ki bor pynïaid jong ka shnong Lumshken ban pynlong ïa kane ka tamasa.
“Ka kam jngohkai pyrthei ka dei kawei na ki lad kamai,” u la ong bad kyntu ba ïa ki nongïalam shnong ban pyndonkam bha ïa kane ka mariang kaba itynnad kaba u Blei u la ai kyrpang.
U la ai ka jingkhublei ruh ïa u Deputy Commissioner uba la leh shitom ban wanrah ïa ki skim na ka District Mineral Funding (DMF) ban pynitynnad ïa kane ka jaka kum ki lynti ïaid kjat, ki jaka ieng ban peitkai ïa ka kshaid bad peit ïa ki lum ki wah bad kumjuh ruh u la ai khublei ruh ïa ki tnat sorkar bapher bapher kiba la pynbna ïa ki jait skim bapher bapher kum ka skim shna Home Stay, Guest House bad kiwei kiwei ki jait skim ki ban kyntiew shuh shuh ïa ka kam jngohkai pyrthei ha kane ka jaka.
U MLA u kyntu ïa ki nongshong shnong ba kin shim ïa kine ki lad jingïarap kiba long ka jingmyntoi ha ka kamai kajih bad kumjuh ruh ban long ka jingmyntoi ïa ki nong jngohkai pyrthei kiba wan sha kane ka thaiñ.
U MDC ka thaiñ Dr. Sankey Shangpung uba long kum u symbud kongsan, u la ong ba ka jingpynlong ïa kane ka tamasa kan long ka lad ka ban kyntiew shuh shuh ïa ka kam jngohkai pyrthei ha ka thaiñ bad kan long ruh ka lad ïoh kam ïoh jam ïa ki nongshong shnong bad kan ïarap ruh ban pynneh pynsah ïa ka riti ka dustur.
U Deputy Commissioner East Jaiñtia Hills District haba kren ha kane ka sngi u la ong, “nga lap ba kine ka jaka kiba don ha shnong Lumshken ki long kiba itynnad haduh katta katta kiba ngam shym poi pyrkhat ba kin itynnad haduh katne. Ym tang ka kshaid Tangnub hynrei wat ki lum ki wah ruh kiba ittnnad. Lyngba ka tnat Tourism ngan pyrshang ban ïarap ban kyntiew ïa kane ka shnong bad ngan sa bthah ruh ïa ka tnat Tourism ba kan pynlong ïa ka jingjurip ïa kane ka shnong ban kyntiew ïa ka kam jngohkai pyrthei ba kin phah ruh ïa ki briew kiba tbit kum ki designer ki ban pynpwan dur shuh shuh ïa ka jingitynnad ka jaka. Nga la ïohi ruh ba ka shnong ka long kaba khuid, yn lah ruh ban pynitynnad shuh shuh da kaba pynwandur da ki jait jingthung kum ki dieng bad kawei ki jingthung.”
“Nga kyntu ïa ki nongshong shnong ban shim kabu ïa kane ban pynlong ruh kum ka lad kamai” u la ong ruh bad bynrap ba un sa phah ïa ki briew na ki tnat treikam ban jurip ïa kane ka shnong Lumshken ha kaba u don ka jingthmu ruh ban pynlong ïa kane ka shnong kum kawei na ki Tourism Model Village hapoh ka District bad nangne yn lah ban sdang sa kiwei kiwei ki shnong ruh.
U la ong ruh ba ha ka DMF ki la ki skim kiba la pyntrei ha kane ka shnong ban kyntiew ïa ki jaka jngohkai pyrthei bad u la ai mynsiem ïa ki bor shnong ba kin nang ïaid shaphrang ha kaba na ka liang jong u bad kiwei kiwei ki tnat sorkar ruh kin ai ka jingïatreilang ban kyntiew ïa ka shnong.
U la pynshlur ïa ki nongshong shnong ba kin sdang ban kamai da kaba shet ïa ki jait jingbam tynrai bad die sha kiba wan jngohkai pyrthei bad khmihlynti ruh ba ynda la kiew bha ka kam kan sa wanrah ruh ka jingkiew ha ka kamai kajih jong ki nongshong shnong.
Ha kane ka sngi, ka ophis u Deputy Commissioner ka la aiti ruh ïa ki Life Jacket bad ka lieng sha ki nongpynïaid shnong jong ka Lumshken na ka bynta kiba nongjngohkai pyrthei kiba kwah ban jngi bad ha ka wah kaba don ha trai ki kshaid.
Ha kane ka jingïalang la sakhi lang da u Waheh Shnong Lumshken u Bah Krin Dkhar, Waheh Shnong barim u Bah Kam bareh,u ophisar na ka tnat Tourism East Jaiñtia Hills District Bah R.Wahlang bad ki ophisar na ka tnat Industries bad na kiwei kiwei ki tnat.