Shillong, Naiwieng, 16: Ka War Jaintia Youth Social Organization (WJYSO) ha ka sngi Thohdieng ka la pynlong ïa ka jingïakynduh lang jong ki dkhot ha U Soso Tham Auditorium, Shillong.
Ha kane ka jingïakynduh la don lang u MLA jong ka Amlarem Constituency u Bah Lahkmen Rymbuid uba la long kum u Kongsan, u Sainik Welfare Officer, Shillong u (Retd) Lt. Col. Bah Sabastian Marbaniang u President Bah Buam Myrchiang bad kiwei kiwei.
Ha kane ka sngi, la pynkup burom ïa u Bah Damani Mahrhem Pohktai uba la ïohrah ïa ka nam lahduh Mr. India 2024 Denim Model bad ïa ka Kong Sumar Selonki Khonglang, kum ka Khasi banyngkong ban pas ïa ka Senior National Arbiter (National Referee ha ka Chess) ba la pyllong da ka All India Chess Federation.
Haba kren ha kum u sngi kum u Kongsan u Lahkmen Rymbui u la ong ba ki samla ki dei ba long kiba la pynkhreh bad ban pynbiang ïalade kat kum ka jingkylla jong ka por.
U la ïathuh ba la don bun ki lad pathai jingtip, ki nongpynmih kali, ki nongpynmih Mobile Phone kiba la shah iehnoh shadien bad shah knieh noh ïa ka kamai bad ka iew jong ki, tang na ka daw ban kim lah ban ïa ïabeh bad ban pynbiang ïa ka ki jingdonkam jong ka por. Une u nongmih khmat u la ïathuh ruh, ba kane ka juk kaba mynta, ka kylla sted haduh katta katta bad ba ki samla ruh ki dei ban saindur thymmai ïa ka pyrkhat ka pyrdain ka jong ki. U la ong ba ka por ka la dei ba ki samla ba ki don hapdeng ki jingpule, ki dei ban phai khmat sha ki jingtrei kam jong ka Sorkar Pdeng bad Sorkar jylla, khnang ba kata ka jingpule jong ki, ka plie lad na ka bynta ka jingïoh kam ïoh kam.
U la ong ba ka Sorkar ka plie buh ki lad ki lynti ban ïarap ïa ki samla ban pynjanai ïa ka sap ka phong bad ka jingtbit jong ki, khnang ba kin lah ban seng ïa ki kam ki jam ban kyrshan ïalade bad ban aikam ïa kiwei. Une u nongmihkhmat u la kyntu ruh ïa ki samla ba ha kane ka jingpule jong ki, ki dei ban buh ïa ka thong, ba ki dei ban long ki banyngkong, khnang ba ki lah ban bat ïa ki kam kiba heh, la ka long ha ki kam Sorkar lane ha ki kam ba seng ki ‘riew shimet.
U Sainik Welfare Officer, Shillong, u Bah Sebastian Marbaniang (Retired Army Lt. Col.), u la ong ba ka Sorkar Pdeng ka la plie shibun ki lad ïohkam ïa ki nongshnong. Hynrei, ka long pat kaba sngewsih ba ki ‘riewlum Khasi jong ngi, ki duna haduh katta katta ban rung sha ki kam shipai. Une u Rangbah shipai ba la shongthait na ka kam shipai, ula ïathuh ruh bun ki lad ba ki kynthei ki lah ban bat ïa ki kam shipai kiba heh. U nonghikai Physics ka North Eastern Hills University, u Professor Severine S. Pohlong u la ïathuh ba ka jingjied na ka bynta ka jingpule MBBS, Engineering bad kiwei mynta ki la kylla bad ba ym shym la pynshong nongrim shuh tang ha ka jingïoh ïa ki Marks kiba heh. Hynrei, la pynshong nongrim ha ka jingpass ïa ki Entrance Examination, kum ka NEET, CUET bad kiwei.
Une u nonghikai u la ïathuh ba ki nongshong jong ka War Jaintia ki la pawkhmat ha ki kam sain hima sima, hynrei, ki dang duna pat ha ki kam synshar khadar jong ka Sorkar. U Legal Aid Defence Counlsel ka West Jaintia Hills, u Muktiar Lop Stevenson Khonglah u la ong ba ka jingtip ïa ka ain ka pynkup bor ïa ki nongshong shnong bad ka ïarap ruh ban ïoh ïa ki hok ki jong ki.
U la ïathuh ba ki briew kiba tip ïa ka ain, ki sngewthuh ruh ba ki don ka jingkitkhlieh ïa kaei kaba ki dei ban leh. Une u muktiar ula ïathuh ruh ba ka ain ka biang ïa ka hok jong kito kiba la shah knieh. Ha kaba kren ha katei ka sngi, u President ka (WJYSO), u Bah Buam Myrchiang ula ïathuh ba ka jingpynlong ïa kane ka Social Meet ka long ban ai jingpynshai lem ïa ki samla ba kin ïoh ïa ki jinghikai bapher khnang ba kin lah ban kot sha kata ka thong jong ki bad ba kin saindur thymmai ïa ki jingmut jingpyrkhat jong ki, kiba ïa dei dur bad ki jingkylla jong ka por. Ïa kane ka prokram, la pyniphuh iphieng da ki jingrwai ba sngewtynnad.
